Storian Blong Mi: Promotem Kava, Promotem Yumi

Long episod blong storian blong mi ia bae yumi toktokt wetem wan Bislama komuniti memba we tokbaot histri, rugby league mo hao hemi stap yusum kava blong promotem yumi mo holem taet ol Bislama komuniti memba tugeta.

Herbie Henderson mo family blong hem long Queensland, Ostrelia

Bislama komuniti long Ostrelia hemi wan growing komuniti, no mata se yumi stap long wanem pat blong kantri ia o hamas yia yumi stap long ples ia, be koneksen blong yumi wetem Vanuatu mo ol difren kalja blong hem, hemi wan samting we I konektem yumi olsem ol memba blong Bislama komuniti.

Herbie Henderson hemi stap live long Sunshine Coast, hemia long Queensland. Hemi kamaot long wan well known famili we plante man mo woman we oli stap long Santo oli save gud long ol olsem famili Henderson.

Histori Blong Famili

"Great grand mother blong mi hemi bon long Iririki, while Papa blong mi mo ol narafala siblings blong mi oli bon long Saint-Michel long Espiritu Santo. Afta we Niu Hebrides i kasem indepense blong hem mo i kam Vanuatu, ol famli blong mi oli muv i kam bak long Ostrelia mo mifala live long Sunshine Coast, long Queensland. Be long 1992 ol famli blong mi oli muv i go bak long Santo. Nara papa, kevin Henderson i stap lukaotem famli bisnis hemia 'Santo Enginers' long side river".

Long 1996, Herbie hemi muv go bak stap long Santo wetem famili blong hem long we. Long taem ia hemi attendem Ecole Public hemia long side-river long santo, hemi skul long ecole public kasem wantaem long 1998. Afta long hemia, mama mo papa blong hem tufala tinktink blong sendem bak hem I kambak long Ostrelia mo hemi kam stap wetem tufala apu blong hem long sunshine coast mo hemi attendem mo finisim Hae Skul blong hem mo long taem ia tu hemi stat tu blong plei rugby league. Passion blong hem blong plei rugby league hemi mekem hem blong wok towodsem drim blong hem ia, but folem samfala injury we hemi kasem mekem hemi no manej blong kontinu blong go long wan professional stej. Beh long 2012, taem hemi go stap wetem ol famili blong hem long Santo, hemi kasem wan call.

Rugby League

"Long taem ia i gat wan tinktink blong statem wan Rugby League tim, mo nem blong mi i bin kamaot, mo coach blong tim long taem ia Mr. Dane Campell hemi callem mi mo askem mi blong pat long fes fala nasonal rugby league tim blong Vanuatu".

Long game we mifala plei long stade long Port Vila hemi wan haelaet blong mi blong luk stadium i fas gud mo ol man oli kalem tree just blong watchem wan Rugby League game, hemi wan spectacular moment lelepet

Herbie Henderson

Kava Hut hemi bon

Long end blong 2020, hemi harem abaotem wan kava pilot prokram blong 2 yia we oli stap mekem blong traem trialem blong karem kava I kambak long Ostrelia commercially mo sem taem tu blong aksesem ol market long ples ia.

Hemi storian tu wetem wan kava bisnis man long Santo abaotem ol posibiliti blong statem wan stoa blong salem kava blong Vanuatu long Ostrelia, so long 2021 hem wetem waef blong hem tufala openem ‘My Kava Hut’ wan onlaen stoa we I salem kava powder mo long end blong 2021, oli tekem tinktink ia I go long wan nara step bakeken taem oli involve long ol Sande maket, wan nara opportunity bakeken we oli tekem blong konek mo toktok wetem ol memba blong komuniti blong promotem kava mo histri abaotem kava.

Herbie hemi talem se hemi importen tumas blong olgeta olsem hem we oli stap salem kava blong oli mas salem wan gudfala prodak long ol niufala kastoma we oli stap yusum ol prodak blong ol. Hemi pointem aot tu se ‘I no gat rapis kava, samtaem bae hemi from mix I no stret o maybe hao oli priperem hemi no stret. Hemi kontiniu tub long talem se wan nara samting tu we hemi impoten hemi blong no mas mekem ol promis long ol kastoma se kava bae hemi fixim evri problem blong ol, from I gat fulap niufala kastoma oli stap lukaotem wan solusen long ol sik o problem blong olgeta. Mo lastly hemi se plante kava kampani long Ostrelia oli stap damajem nem blong Vanuatu kava, from nomo se oli salem ol inferior Kava we hemi no mitim standard blong Ostrelian market.”

My Kava hut stoa long Bundaberg hemi kam olsem wan miting ples blong ol Bislama komuniti long eria ia, hemi no saplaem kava nomo be wan ples we ol komuniti memba oli save kam staon mo mitim ol narafala memba long komuniti we oli stap long ples ia. Stoa ia hemia located long shop 4/39 Bourbong Street, hemia stret long Bundaberg, long Queensland Ostrelia.

Herbie wetem samfala memba blong Bislama komuniti long Bundaberg, Queensland, Ostrelia