Ngunkeng Jim Chalmers nih 2024 in 2025 kar ramkomh cozah tangka hmannak ding a rak chuahpi cang.
2023 in 2024 kar ramkomh cozah tangka hmannak zoh tikah tangka a hlei mi hi $9.3 billion a si. Albanese cozah nih kum hnih peh in tangka hmannak ding a zat an khiahmi nak tam an hmang lo.
Nain, a ra lai dingmi kum 4 chung hi an lut leinak in a chuak lei a tam deuh te lai tiah an purhdah.
A tanglei ah tangka hmannak ding le a zat ka rak langhter lai.
$3.5 billion
A cunglei i ka langhtermi a zat hi mei man bawmhnak caah sengsenmi a si. Innchungkhar nih an hman mi mei man le chaw lethal a tuahmi (small business) cheukhat hna nih an hman mi mei man bawmhnak caah chiah mi a si.
2023 July 1 thok in, Australia innchungkhar kip nih mei man bawmhnak $300 cio an hmuh lai.
Small business a ngei mi chungin nuaikhat tluk nih 2024 in 2025 kar ah $325 mei man caah bawmhnak an hmuh ve lai.
$1.9 Billion
A cunglei ah ka rak langhter mi zat hi innhlangmi bawmhnak an chiah mi a si. Inn hlangmi hna nih inn man an pek mi chungin zatuak 10% an rak bawm a si tawn.
Nain, Sept thla hnu in zatuak 15% an bawmh cang hna lai.
Nu hmei le pahmei si hna seh, nuva hmunkhat ah a um mi hna nih bawmhnak zarhhnih ah $70 nak tam an hmu lai.
$11.3 Billion
A cunglei ah ka rak langhtermi zat hi cozah nih ram mi chungin inn cawk a duh mi hna caah bawmhnak a chiahmi a si. Cun, kum 2030 hlan ah inn thar nuai khat leng sak dingin cozah nih bia a kam cang.
Umnak a ngei lo mi homeless le a dangdang caah kum 5 chung hman dingmi tangka $9.3 tluk cozah nih a chiah.
Chungkhar buainak ruangah dornak a ngei lo mi nu le hngakchia caah bawmhnak $1 billion tluk a chiah piak rih hna.
Cun, ramkhulh kip ah lam le sul, ti luannak, mei peknak, ti peknak le a dangdang inn thar saknak ding caah a herh mi pawl caah $1 billion hman ding a chiah.
$925 Million
A cunglei ah ka rak langhter mi zat hi ramkomhj cozah nih chungkhar buainak ruangah har a tongmi hna bawmhnak program caah a chiah mi a si.
Chungkhar buainak ruangah nuva a then mi le fale umnak a ngei lo mi hna caah bawmhnak $5000 a chiah piak hna, a voikhatnak ah $1,500 an hmu lai cun herh hai dangdang cawknak caah a dang tein $3500 a pek than hna lai.
Bawmhnak a pe kho tu ding minung zong kawl piak an si lai, an himnak ding kong zong tlangtlakpi an si lai.
$3 billion
A cunglei ah ka rak langhter mi zat hi cozah nih sianghleirun siangngakchia leiba cham piak nak ding caah a sengsenmi a si. Siangngakchia nuai thum tluk an leiba an hnon piak hna lai.
$1.3 billion
Riantuantu chungin low income le middle income a hmu mi hna nih ngunkhuai an pek dingmi zat cozah nih an tthumh piak hna lai. A cunglei I langhter mi tangka khi ngunkhuai petu hna ca bawmhnak a si.
Kum khat a tlangpi in $73,000 a hmu mi cu ngunkhuai $1,500 nak tam dawt an si lai.
$2.8 billion
A cunglei ah langhter mi tangka zat hi cozah nih medicare sersiamnak caah a sengsenmi a si.
Lungthin ngandamnak lei I zohkhenhnak caah $888 million tluk an chiah. Lungthin lei a ngan a dam lo mi hna nih bawmhnak fawizaang deuh in an hmuh khawh nak hnga digital service zong tuah piak an si lai. Kum khat chungah minung 150,000 lengmang bawmhnak pek dingin cozah nih a ruahchan.
Cun, nau a ngei ka mi nu hna chungin caan sau deuh siizungah thlop a hau mi, le nau a pawi lio mi hna nih specialist siibawi an tonnak khawhnak ding caah bawmhnak $49 million chiah piak an si.
$55.68 billion
A cunglei ah rak langhter mi tangka hi Australia ram kilvennak ding caah hman a si lai. Australia, US le Uk ram pathum I komh in ralkap training tuah ti dingin timhlamhnak an ngei. Cun, nuclear thazaang hmangin an ser mi submarines zong cawk dingin timhlamh a si.
July 1 thok in Australian Submarine Agency nih Nuclear submarine program cu tuanvo an lak lai, i mipi ngunkhuai pek mi tangka chungin $383 million lengmang hi program caah a kal lai.
$27 million
A cunglei I rak langhter mi tangka zat cu ralzam le mipem bawmhnak caah sengsenmi a si.
Cozah nih ralzam le mipem bawmhnak caah siseh, mino chungin bawmh a herh mi pawl hna caah le chungkhar buainak ruangah harnak a tong mi nu le ngakchia caah $27 million a chiah.
Israel le Hamas raldohnak ruangah harnak a tongmi pumpak le chungkhar hna caah a hlei in $900,000 a chiah.
$5 million
A cunglei ah ka rak langhter mi hi ti chung thilnung le pawngkam zohkhennak caah hman dingin cozah nih a chiahmi tangka a si. Khualtlawng mi hna nih an fuh panh lengmang mi The Great Barrier Reef sersiamnak le ti chung lawnlennak sersiamnak ca zong a tel chih.
- Additional reporting by the Australian Associated Press
