January 26 uas yog hnub Australia Day tseem yog ib hnub tu siab thiab hnub teebmeem rau coob tus neeg txum tim

Yeej muaj cov kev tawm tswv yim ntawm Australia tej neeg zejzog coj ntseeg ntau yam kab lis kev cai tiam vammeej txog hnub ua kev zoo siab rau hnub Australia Day muaj ceem zujzus tuaj txhua xyoo lawm. Tam sim no ces hnub tim 26 lub 1 hlis ntuj - tseem yog ib hnub ua rau muaj kev tu siab tsis yog yuav ua kev zoo siab hais tsi ntsees rau Australia tej keeb cag neeg (neeg txum tim).

People take part in an "Invasion Day" rally on Australia Day in Melbourne on January 26, 2018. Tens of thousands of people marched across Australia on January 26 in an "Invasion Day" protest calling for a rethink of the national day they say is offensive to Indigenous people. Credit: PETER PARKS/AFP via Getty Images

Thoob lub teb chaws no ces, lub 1 hlis ntuj tim 26 yog zej tsoom hnub so (Public Holiday) uas yeej muaj tej zejzog ci nqaij noj thiab ua kev lom zem rau hnub so no, thiab yog hnub xaus lub caij holiday rau caij ntuj so lawm. Thiab kuj yog ib hnub uas muaj ntau pua tus pej xeem Australia yuav tau txais kev lees paub txog lawv cov meej mom haiv thiab tej dej num lawv tau ua pab rau tej zejzog.

Tab sis yog xam rau coob leej ntau tus neeg txum tim lawm, ces yog ib hnub uas muaj lub ntsiab lus txawv heev thiab yog ib hnub tu siab thiab xav txog, vim yog ib hnub uas tej neeg Aaskiv tau pib tuaj nam nias liaj ia teb chaws uas ua rau muaj tsov rog, muaj kev tua neeg npog nroj ntsuab kom tu noob, muaj kev faib cais ntxub ntxaug tsis nyiam lwm tsav neeg thiab muaj lwm cov kev tua tej neeg txum tim ntau phaum neeg.

Txawm tau muaj tej xwm txheej no los, yeej tseem muaj ntau txheeb cov neeg zejzog tsiv teb tsaws chaw tshiab los yog tej uas ib txwm nyob ntev lawm yeej tseem ua kev zoo siab rau cov kev tau ras los ua pej xeem ntawm teb chaws Australia no thiab.

Yog li ntawd ne, puas tsim nyog ib hnub cuam tshuam nrog cov kev sib ntaus sib tua, uas teev txog thawj phaum nkoj tuaj txog teb chaws no, ras los ua tib hnub uas tej neeg zejzog coj ntseeg ntau yam kab lis kev cai ua kev zoo siab rau cov kev koom npoj raws Australia tus chij? Vim tseem yog ib nqe lus nug uas tej zejzog coj ntseeg ntau yam kab lis kev cai yeej tsis tshua totaub yooj yim.

'Puas tsim nyog peb txhawb nqa kom muaj feem koom'

Raws li cov kev txheeb pej xeem xyoo 2021, ces yeej muaj neeg coob tshaj 7 million tus los sis yog xam ua 29.3 feem pua ntawm Australia tej pej xeem, tsis xam tej neeg uas tsis paub tias yug qhov twg, yog cov neeg yug txawv teb chaws.

Assefa Bekele, yog ib tug neeg ntawm Sydney cov neeg zejzog Ethiopian, uas yeej tau ua hauj lwm nrog zejzog neeg txum tim thiab yeej xav paub txog keeb cag neeg tej keeb kwm heev li.

Nws hais tias yog tej yam tseem ceeb heev uas yuav tsum txhawb nqa kom tej neeg mloog tau tias lawv yog ib feem ntawm tej zejzog los yog yog ib feem ntawm ib haiv neeg twg.

Mr Bekele tau hais tias “Yuav tsum xyuas kom txhua tus neeg ntiag tug, txhua tus pej xeem thiab hais tsi ntsees rau tej neeg tuaj txawv teb chaws tuaj thiab Australia tej neeg txum tim uas nyob ntawm lub teb chaws no los ntev tshaj 60,000 xyoo kom lawv mloog tau tias lawv muaj feem thiab.''

"Thiab li peb paub lawm tias, yog peb sib faib sib qhia keeb kwm, kab lis kev cai thiab txhua yam ces yuav ua rau peb mloog tau tias peb yog ib feem thiab peb nyob ua ib tsob ib txoog.''

''Kuv yeej tsis muaj teeb meem dab tsi txog cov kev hloov hnub (Australia Day) li tiag tiag hos. Teb chaws Australia los yeej vam meej zujzus tuaj thiab caij nyoog los kuj tab tom hloov zujzus lawm thiab tej neeg los yuav tsum tau hloov raws thiab.'''

Australia yog ib lub teb chaws coj ntseeg ntau yam kab lis kev cai thiab tsim nyog hwm Australia tej kab lis kev cai txhua yam.

Asefa Bekele

"Yog thaum peb ua tib zoo xav lawm, ces tag nrho peb sawv daws yeej tsuas xav tau kev thaj yeeb, kev koom npoj, thiab kev nyob ua ib tsob ib txoog xwb.''

'Ua kev zoo siab rau hnub yuam kev lawm'

Gavin Somers yog ib tug txiv neej neeg txum tim caj ceg neeg Butchulla thiab Gubbi Gubbi, thiab kuj yog ib tug neeg nqua yas suab thiab yog tus neeg sau yas suab. Nws yeej lees paub txog qhov tseem ceeb ntawm cov kev muaj ib hnub coj los ua kev zoo siab rau Australia thiab cov kev ras los ua ib tug neeg Australia, tab sis nws hais tias hnub tam sim no (hnub Australia Day) yog ib hnub ua kev zoo siab rau hnub yuam kev lawm.

Mr Somers tau hais tias ''Peb yuav tsum nrhiav ib hnub uas peb muaj peev xwm los ua kev zoo siab puv npo, nrog peb tej phooj ywg ntawm lwm cov neeg zejzog coj ntseeg ntau yam kab lis kev cai uas nyob ntawm teb chaws no tib yam thiab.''

"Thiaj tseem ceeb uas thaum peb sib sau ua ke thiab los ua kev zoo siab rau hnub no lawm kom peb xav mus raws tib seem xwb.''

uas sawv daws muaj

Hnub Australia Day ua rau muaj ntau yam nug nyuaj

Craig Rigney yog ib tug txiv neej neeg txum tim caj ceg neeg Ngarrindjeri thiab Kaurna thiab yog tus coj ntawm lub koom haum KWY, uas tsis nce rau tsoom fwv, thiab yog ib lub koom haum uas neeg keeb cag neeg Aboriginal tej zejzog yog tus tswj hais tias, hnub Australia Day yeej tseem yog ib hnub uas ua rau muaj ntau yam lus nug tsis yooj yim.

Hnub Australia Day no, tsim nyog peb cheem peb me ntsi rau ib lub caij luv luv twg los nug peb tias: 'Peb ho pom lwm tus zoo li cas xwb?'

Craig Rigney

Mr Rigney tau hais tias "Peb puas xam pom tias peb nyob rau lub neej uas peb yuav muaj tau lub neej pem suab ua ke?''

"Kuv xav tias qhov ntawd yuav ua qhov txiav txim peb txoj hmoo, peb lub neej pem suab, peb ho yuav hwm peb tus kheej li cas thiab peb ho yuav coj thiab hwm ib tug twg li cas."

Cr Angelica Panopoulos Credit: Angelica Panopoulos

Nyob rau qee cov xeev, ces tej nom tswv zos yeej tsis pom zoo rau cov kev yuav los lees paub pej xeem tshiab los sis yog ua lwm yam kooom txoos rau hnub tim 26 lub 1 hli ntuj li, suav lub zos Merri-Bek city council ntawm sab qaum teb ntawm nroog Melbourne uas nyob ntawm haiv neeg Kulin uas muaj cov neeg Wurundjeri Woi-Wurrung nyob ntawd.

Angelica Panopoulos uas yog tus tswv zos no hais tias - hnub tim 26 lub 1 hlis ntuj - yog ib hnub cuam tshuam nrog cov neeg txum tim cov kev pib nyiaj ntxeem los tau ntau tiam lawm.

Nws tau hais tias ''Yog hnub (xyoo 1788) uas Captain Arthur Philip (thiab yog thawj fij nkoj - First Fleet) uas tau tuaj rau teb chaws Australia no, thiab tau pib tuaj txeeb liaj ia teb chaws thiab pib tua neeg tsheej pab kom tu noob.''

''Vim peb yeej paub tseeb tias peb yeej tseem muaj ntau yam teeb meem tau ntshai rau ntau phaum neeg, tseem muaj cov kev teeb tsa uas faib cais ntxub ntxaug tsis nyiam lwm tsav neeg, thiab tej txheej txheem txiav txim plaub ntug uas yog ntau yam ntawm cov kev (tuaj nam nias liaj ia teb chaws no).''

"Yog li no thiaj tseem ceeb heev uas peb mloog thiab thaum uas tej neeg txum tim qhia rau peb tias hnub tim 26 lub 1 hlis ntuj tsis yog ib hnub ua kev zoo siab.''

Mr Rigney says it's time Australia listened and learned from those uncomfortable with the current date of Australia Day.

Mr Rigney yeej tau tawm cov lus tawm tswv yim no tias: ''Peb yeej muaj lub zoo cib fim yuav los kawm, sib qhia thiab los mloog tam li ib lub zejzog thiab tam li ib haiv neeg.''

"Kuv ntseeg tias tam li ib feem ntawm tej zejzog no thiab haiv neeg no, peb yuav tau lees paub, yuav tau hwm thiab saib lwm tus rau lub sam xeeb ntawm lub teb chaws Australia no.''

Txawm li cas los nws kuj tau hais tias, cov kev pheej tseem sib teev theev tias hnub twg thiaj tsim nyog neeg Australia ua kev zoo siab no kuj yeej tseem ua rau muaj kev nkag siab yuam kev thiab ua rau tej neeg muaj kev sib tawg tswj thiab.

Nws tau hais tias cov kev tham txog hnub Australia Day uas yog hnub tim 26 lub 1 hlis ntuj ntawd kuj tseem yog tej yam tshiab thiab, vim nyuam qhuav muaj neeg ua kev zoo siab thoob Australia no txij li xyoo 1994 los xwb thiab.