Suav tuam tshoj thiab Australia yuav pub ib tog twg tej pej xeem thov tau visa ntoj ncig thiab ua lagluam ntau zaus uas siv tau ntev txog 5 xyoos txij hnub zwj Kuab (Friday 21.06.2024) mus raws li Suav lub tuam chav tswj dej num txawv teb chaws hais. Thiab raws li SBS Chinese qhia ces yuav pib siv cov visa no txij tim 1 lub 7 hli ntuj xyoo 2024 no mus txog rau tim 31 lub 12 hlis ntuj xyoo 2025, tab sis kuj tseem tsis tau muaj xov xwm ntxaws qhia txog tej visa no.
Xov xwm me ntsis qhia txog tej xwm txheej no: Cov kev qhia txog cov kev pub ob tog pej xeem ntawm ob lub teb chaws no siv tau visa li hais no yog ib lub cim qhia tias rov qab muaj kev sib raug zoo ntawm ob lub teb chas no tuaj ntxiv tom qab Suav tuam tshoj tus thawj pwm tsav Li Qiang tau tuaj xyuas Australia.
Peb ho paub dab tsi txog tej no ntxiv: Yav tas los mas ib tug pej xeem Suav tsuas muaj peev xwm thov tau visa siv ntev txog li 1 xyoos tuaj xyuas Australia xwb, los yog tsuas thov tau visa siv txog li ntawm 10 lub xyoo siv yog tias tej neeg ntoj ncig ntawd yog cov uas pheej tuaj tas mus li.
Txij xyoo 2023 ces Suav tuam tshoj kuj tau tso kev yooj yim me ntsis rau tej neeg ua lagluam thiab ntoj ncig ntawm qee lub teb chaws lawm, tom qab tau 3 xyoos uas tau muaj cov kev txwv kab mob COVID-19 nruj heev uas tau ua rau tau muab pej kum haiv tej ciam teb kaws feem ntau kaw.
Ho yuav muaj dab tsi tshwm sim ntxiv: Lub caij uas Suav tus thawj pwm tsav Li tseem tab tom tuaj xyuas Australia ntawd, ces nws kuj tau hais tias Suav tuam tshoj los kuj yuav teev Australia nrog rau nws cov visa waiver scheme uas yuav tso cai rau neeg Australia muaj peev xwm mus ncig tau teb chaws Suav tuam tshoj tau txog li ntawm 15 hnub yam tsis tas thov visa siv.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
