Xov xwm luv tshaj tawm hnub zwj Feej (Wednesday newsflash 24.01.2024):
Australia tus thawj pwm tsav Anthony Albanese hais tias Kim Williams yog ib tug neeg muaj peev xwm, paub ntau yam thiab phim los ua tus coj Australia lub chaw nthuav xov xwm Australian Broadcasting Corporation (ABC).
Lub koom haum Australian Council of Trade Unions zoo siab rau thawj pwm tsav Anthony Albanese cov kev hloov rau cov kev txo se theem peb uas nws yuav tsub se li qub ntawm 37 feem pua rau tej neeg ua hauj lwm thiab yuav muab cov neeg khwv tau nyiaj txog li $50,000 them se raws li cov neeg khwv tau nyiaj tsawg.
Kuj tau muaj cov kev nqua hu rau tej neeg sab qaum teb ntawm xeev Queensland ntawm lub zos Ayr txog rau Mackay suav Whitsundays ntxog thiab npaj tos lub khaub zeeg cua Kirrily, uas yuav ua rau muaj cua hlob muaj ceem txog 120km/hr los hla lub pov txwv Whitesunday Islands thiab tej ntug hiav txwv txij Townsvills thiab St Lawrence rau lub caij lub khaub zeeg cua no los rau lub xeev no tej ntug hiav txwv.
Steven Marshall uas yog South Australia tus qub hau xeev tau qhia tias nws yuav tawm tsis ua nom lawm tom qab ua nom los tau 14 xyoos. Tau muaj tej xo no tom qab hnub tim 23.01.2024 uas Australia tus qub thawj pwm tsav Scott Morrison tau qhia rau nws phau Instagram account tias nws yuav tawm tsis ua nom ntxiv tom qab ua nom los tau 16 xyoo.
Turkey lub tsev tsoom fwv tau tawm 287 lub suab pom zoo los lees Sweden ua tub koom siab nrog lub koom haum NATO tom nws txhawj tias tsam tsis tau txais kev ruaj ntseg vim Russia tau nam nias Ukraine.
The Laotian Times tau tshaj tawm tias tau muaj ib tug poj niam neeg Cob Tsib tau ntxias 5 tug poj niam neeg Nyab laj mus ua hauj lwm ntawm teb chaws Phabmab, tab sis muab tej neeg no tej passports txeeb cia thiab xa lawv mus ua hauj lwm twv txiaj yuam pov txhaum cai thiab ntxias dag tej neeg hauv Nplog teb. Nom tswv txheeb tau tej neeg no tab sis ib tug twg yuav tau them nyiaj tshaj USD 8,000 thiaj tau rov qab mus tsev. Tej teeb meem nyiag neeg txhaum cai, twv txiaj yuam pov txhaum cai, cryptocurrency thiab nplees nkauj nraug no tau ua rau muaj tej neeg ntau caum txheeb tus raug neeg phem ntxias dag ntawm cheeb tsam Southeast Asia.
Bangkoj Post tau tshaj tawm tias Thaib tus thawj pwm tsav Srettha Thavisin tau nqua hu kom Thaib tej nom tswv nrog kho tej cai lij choj thiab tej kev cai ua luam kom ua tau lagluam yooj yim ntawm teb chaws Thaib tom qab nws tau mus koom lub rooj sab laj World Economic Forum ntawm Switzerland thiab muaj pej kum haiv tej tuam txhab yws tias tsis muaj peev xwm ua tau lagluam yooj yim ntawm lub teb chaws Thaib no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
