Australia tej hluas xav kom muaj cai pov puag lawv kev noj qab nyob zoo

Xov xwm luv tshaj tawm hnub zwj Quag (Tuesday news 14.11.2023).

Studio Source: SBS

Xov xwm luv tshaj tawm hnub zwj Quag (Tuesday news 14.11.2023):

Mekas lub tsev dawb nqua hu kom yuav tsum pov puag tej tsev kho mob ntawm Gaza.

Lwm pab nom teb chaws xav kom tsoom fwv Albanese qhia qhov tseeb txog cov kev muab tej neeg tsiv teb tsaws chaw tuaj tsis raug cai rau teb chaws Australia uas raug muab kaw tsis paub hnub twg yuav raug tso.

Lub caij 10 dhau los no ces muaj tej tsev ntiav rau tej neeg nyob tsawg tshaj plaws li lawm hais tsi ntsees rau tej vaj tse ntiav rau tej neeg nyob ntawm tej zos yaj sab, vim tej nqe tsev kim tshaj tej nyiaj hauj lwm ua khwv tau lawm.

Tej hluas tau tawm tsam thiab nqua hu kom tsoom fwv Albanese tsim cai los pov puag lawv kom tau txais kev noj qab nyob zoo vim tej huab cua pauv hloov.

Tau muaj ib tug neeg tua hluav taws ntawm xeev Tasmania sab qab teb hnub tuaj raug coj mus kho ntawm tsev kho mob vim tau nqus pas taws ntawm tej hav zoo kub hnyiab.

Tej teb chaws vam meej tau nqua hu kom Russia xaus tsov rog ntawm Ukraine thiab tso tseg tsis txhob ua txhaum leej tib neeg txoj cai ntawm nws lub teb chaws.

Thaib tus thawj pwm tsav Srettha Thavisin tau qhia tias nws tus tsoom fwv koom tswj yeej yuav tau cov suab pom zoo rau nws cov digital wallet budget kom tsim tau tsab cai no siv raws li Bangkok Post tau qhia, thiab Thaib lub tuam chav tswj kev ntoj ncig qhia tias cov kev pub visa rau tej neeg ntoj ncig nyob tau ntev ntawm teb chaws Thaib tsis yog ib cov txaus txhawj xeeb li cas tom qab uas tau muaj zej tsoom cov kev txhawj xeeb txog Suav cov tub ceev xwm yuav tuaj ua hauj lwm koom tswj kev ruaj ntseg kom tej neeg ntoj ncig Suav tau kev ntseeg siab rov qab mus ncig teb chaws Thaib.

Megan Jones yog Australia tus Ambassador tshiab ua hauj lwm hauv tuam ceeb Vientiane hloov Paul Kelly uas yog tus nom qub dhau los raws li The Laotian Times tau tshaj tawm.

Vientiane Times tau tshaj tawm tias nom tswv Japan tshwm nyiaj tshaj USD 27 million los pab kho Nplog lub tsav sib tw Chao Anouvong Stadium.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.