Tso tseg negative gearing mas pab nom Greens thiaj pab Labor cov hauj lwm Help to Buy

Pab nom Greens hais tias yog pab nom tsoom fwv Albanese xav los kho nws tsab cai Housing Bill ces nws yuav tau tso tseg tsis txhob siv cov negative gearing mas thiaj tau txais kev pab cuam ntawm nws los ua cov hauj lwm 'Help to Buy' uas yuav pab tej neeg yuav tsev nyob.

Xov xwm luv Credit: SBS/Max Banyat

Xov xwm luv tshaj tawm hnub zwj Feej (Wednesday newsflash 28.02.2024):

Pab nom Labor tau los qhia nws cov kev txo se theem peb rau zej tsoom paub tom qab muaj peev xwm tsim tau tsab cai no ntawm tsev kis xeev siab (Senate) nag hmo hnub tim 27 lub 2 hlis ntuj. Ces tej neeg Australia uas khwv tau nyiaj hauj lwm ib xyoos twg tsawg dua $150,000 yuav tau nyiaj txo se ntau dua hos cov neeg khwv tau nyiaj ntau tshaj ntawd ces yuav tau nyiaj los ntawm cov kev txo se no tsawg dua yog piv rau tsab cai qub uas tsis tau kho ntawd.

Pab nom Greens nqua hu kom tsoom fwv Albanese tso tseg tsis txhob siv cov negative gearing mas nws thiaj yuav pab tus tsoom fwv no los tsim nws tsab cai Housing Bill kom nws thiaj muaj peev xwm los ua tau cov hauj lwm pab neeg Australia yuav tsev nyob (Help to Buy). Cov hauj lwm no yog Labor ib co kev cog lus tseem ceeb uas nws tau hais rau lub caij tseem xaiv nom, uas muaj lub hom phiaj yuav pab them cov nyiaj deposit yuav tsev txog li 40% pab rau tej neeg txog li ntawm 40,000 tus kom muaj peev xwm yuav tsev.

Tau muaj UN ib tug nom tseem ceeb hais tias tej zaum ntshe yuav muaj tej pej xeem ntawm Gaza strip txog li ntawm 576,000 uas yog 25 feem pua ntawm Gaza tej pej xeem yuav dhia tsis dhau ntawm ''cov xwm txheej tuag tshaib'' yog tias tsis kub siab los nrog daws tej xwm txheej tsov rog kom mus pab tau tej neeg txom nyem, raws li Ramesh Rajasingham uas yog tus coordination director rau UN lub koom haum Office for Coordination of Humanatarian Affairs tau qhia rau UN Security Council.

Pab nom Labor no tseem yuav los ua tib zoo kho kho tej qub tub rog no muaj peev xwm thov tau nyiaj coj los pab rau lawv raws li cov entitlement system. Raws li nws tsab cai uas nws xav thov los kho ntawd ces, yuav ua tib zoo los xyuas tej cai uas tswj cov compensation, cov rehabilitation thiab entitlement claims raws li tsab cai Military Rehabilitation and Compensation Act ntawd.

Victoria no tseem yuav ntsib teeb meem phom sij los ntawm tej hav zoov kub hnyiab ntau teev ntxiv thiab ua ntej uas tej xwm txheej phom sij no tshwm sim nyob rau sab hnub poob ntawm lub xeev Victoria no. Thiab tus coj ntawm lub koom haum tua hluav taws yaj sab kuj tau muaj ib cov kev nqua hu kom tej neeg yuav tsum tsiv tawm ntawm thaj chaw hav zoov kub hnyiab. Yog li ntawd thaj hav zoov kub hnyiab Bayindeen thiaj li tab tom kub muaj ceem heev nyob rau sab qaum teb hnub poob ntawm Ballarat uas twb tau kub tej chaw dav tshaj li 21,300 hectares, thiab kuj tau muaj cov kev kwv yees hais tias yuav muaj huab cua kub sov tshaj li ntawm 30 degree thiab tseem yuav muaj cua hlob muaj ceem txog li ntawm 80 km/h ces ntshe haj yam yuav ua rau kob hluav taws no kub muaj ceem tuaj ntxiv.

Senator Lydia Thorpe kuj ua rau muaj cov kev sib cov nyom hauv tsev kis xeev siab tom qab tau muaj cov kev tsis sib haum xeeb nrog rau tus kis tswj tsev tsoom fwv siab, ces thiaj tau ua rau tau ua rau muab cov hauj lwm sib teev theev no ncua lawm.

Lub koom haum FIFA no kuj tau pab Nplog lub koom haum ncaws pob Lao Football Federation los kho dua ib lub chaw xyaum Nplog tej neeg sib tw ncaws pob hu ua Champi-Champa Trainning Centre raws li phau ntawv xov xwm The Laotian Times tau tshaj tawm.

Thiab raws li Thaib tus kws lij choj teb chaws tau qhia ces kuj qhia tias tej zaum tus hau tub ceev xwm teb chaws dhau los uas pab tus neeg hu ua Vorayuth ''Boss'' Yoovidhya uas yog ib tug neeg ntawm lub tuam txhab Red Bull empire no kom nws tsis txhob raug rau txim rau lub caij uas nws ua tsheb nrau ib tug neeg rau lub caij xyoo 2012 ntawd.

Kuj tau muaj ib co kev ceeb toom tias teb chaws Thaib thiab teb chaws Nyab laj yog ob lub teb chaws uas raug tej neeg phem tsim teeb meem cyber attack rau lawv, thiab yuav mus nyiag lawv tej xov xwm cuam tshuam txog cov facial recognition los yog biometric data. Tab sis qhov txaus txhawj xeeb tshaj plaws mas vim rau qhov tias muaj cov AI los yog Artificial Intelligence technology no ntau tuaj ntxiv ces thiaj li ua rau tej neeg cybercriminals muaj peev xwm los nyiag tau tej xov xwm ntiag tug raws li Bangkok Post tshaj tawm.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.