Ntau yam kev pauv hloov txij tim 1 lub 7 hli ntuj xyoo 2024

Txij tim 1 lub 7 hli ntuj xyoo 2024 no mus ces yuav muaj ntau yam kev pauv hloov tshiab lawm, tsis hais cov kev yuav tau nyiaj los ntawm cov kev them se tsawg zog, yuav tau nyiaj pab them nqe hluav taws xob, yuav them se tsawg, tau nyiaj hauj lwm national minimum wage thiab nyiaj superannuation guarantee, nrog rau cov kev nce nqe rau tej passport, cov kev tsis muaj peev xwm thov tau qee cov visa siv ntxiv ntawm Australia, cov kev yuav tau tshuaj pheej yig thiab cov kev muaj peev xwm yuav tau luam ceeb pa haus nrog rau South Australia cov kev ntiav tsev.

Australian Treasurer Jim Chalmers speaks during Question Time in the House of Representatives at Parliament House in Canberra Source: AAP / LUKAS COCH/AAPIMAGE

Txij hnub tim 1 lub 7 hli ntuj xyoo 2024 no mus ces yuav muaj ntau yam pauv hloov.

Treasurer Jim Chalmers thiaj tau hais tias ''Txij tim 1 lub 7 hli ntuj mus ces txhua tus neeg ua hauj lwm them se yuav tau them se tsawg, txhua yim neeg yuav tau nyiaj pab them nqe hluav taws xob, ntau millions tus neeg Australia yuav tau cov nyiaj awards wages ntau tuaj ntxiv, yuav tau paid parental leave 2 limtiam ntau tuaj ntxiv, yuav tau tshuaj pheej yig dua siv, tej no yog tej hauj lwm pab kom ntau tus neeg Australia khwv tau nyiaj ntau ntxiv.''

Ces thiaj yuav tau nyiaj raws li hauv qab no:

• Neeg Australia yuav tau them se tsawg zog thiab yuav tau nyiaj txij li $345 mus txog $4,529 dollars los ntawm cov kev txo se. Tab sis tsis tau ib pob tag nrho tsuas tau li ntawm $40 ib limtiam twg ntau tuaj ntxiv xwb.
• Tau nyiaj National Award Wage 3.75 feem puas ntau tuaj ntxiv los sis yog tau $915.90 ib limtiam los yog tau ib teev twg $24.10 dollars.
• Tej cuab yig yuav tau nyiaj pab them nqe hluav taws xob 4 zaug, ib zaug twg tau txog $75 txhua txhua 3 hlis twg ntxiv ntawd los Queensland ib yig twg kuj tseem tau nyiaj ntawm nom tswv xeev pab ntxiv li $1,000, hos Tasmania tej cuab yig ces tau ib yig twg txog li $250. Tsis tas li ntawd tej lagluam me tseem tau tej nyiaj no tib zaug txog $325 thiab.
• Tau nyiaj superannuation guarantee nce ntau tuaj ntxiv ntawm 11% mua 11.5%.
• Tau nyiaj pab cuam me ntsis ntxiv rau ntau cov kev pab cuam Age pension, Disability Pension, Carer payment, Parental payment thiab Family Tax Benefit ntawm Centrelink xam raws cov indexation.
• Nqe passport yuav kim tuaj ntxiv nces ntawm $346 ua $398, thiab muaj peev xwm thov tau passport rau 5 hnub tas sis yuav tau them $100 ntxiv.
• Nqe thov Student visa siv yuav kim 2 npaug ntxiv nce ntawm $710 ua $1,600. Thiab tej neeg tau cov Visitor visa thiab Temporary Graduate Visa yuav tsis muaj peev xwm thov tau lwm yam visa siv txuas ntxiv thaum tseem nyob ntawm Australia no ntxiv lawm.
• Neeg Australia los kuj yuav muaj peev xwm yuav tau tshuaj pheej yig dua ntxiv raws cov kev pab Pharmaceutical Benefits Scheme (PBS) uas tsuas tau them ntau khaws nkaus txog $31.60 xwb.
• Tej niam txiv so yug me nyuam tshiab kuj yuav muaj peev xwm siv tau cov paid parental leave tau 26 weeks (6 hli) tom qab tsoom fwv Australia tau pom zoo pub 2 limtiam ntxiv rau 24 limtiam lub 3 hlis ntuj xyoo 2024.
• Tej neeg yuav muaj peev xwm yuav tau tej luam yeeb pa haus ntawm tej khw muag tshuaj lawm xwb, tab sis txij lub 7 hli txog 10 hli ntuj tseem yuav tau ntawv tso cai ntawm kws kho mob. Tej neeg hnoob nyoog qes dua 18 xyoo tsis muaj peev xwm yuav tau tej luam yeeb pa haus.
• Australia tau tsim cai los txwv tsis pub muag tej stone bench top ntxiv coj los ua kev 'pov puag Australia tej neeg ua hauj lwm tradies kom tau txais kev noj qab nyob zoo thiab noj qab haus huv rau yav pem suab,' thiab tsuas zam rau tej uas twb tau kos xyeem mem tes rau contract ua luam lawm xwb.
• Xeev New South Wales (NSW) ces yuav tswj tej chaw ua koob tsheej paj nruag kom nruj ntxiv.
• South Australia los kuj yuav tswj cov kev ntiav tsev kom nruj ntxiv li yuav ua kom nyuaj ntxiv tsis pub tej tswv tsev cia li tso tseg tsis ua raws li cov kev pom zoo ntiav rau ib lub caij twg thiab.
• Queensland los kuj sam sim npaj 'tsim kev pom zoo' nrog nws tej neeg txum tim rau lub caij los txheeb txog qhov tseeb thiab sib kho kom haum xeeb uas tseem yuav pib.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.