Pab nom koom tswj tej tswv yim daws teeb meem huab cua pauv hloov

Vim li cas lwm pab nom teb chaws (Pab nom koom tswj (Liberal National Party) tej cai daws teeb meem huab cua pauv hloov thiaj raug tib hnyav heev.

The Coalitions emissions policy has met with criticism Source: Moment RF / Weiquan Lin/Getty Images

Tau muaj cov kev sib cav muaj ceem heev ntawm tsoom fwv Albanese thiab pab nom koom tswj (Caolition: Liberal National Party) txog tej tswv yim los daws tej teeb meem huab cua pauv hloov thiab txo tej pa tsis huv paug tsuas rau tej ib puag ncig.

Thawj pwm tsav Anthony Albanese hais tias ''Peter Dutton mas haj yam tsis muaj peev xwm yuav daws tau tej teeb meem huab cua pauv hloov npaum li Scott Morrison lawm thiab. Nws ces tsuas pom txog qhov phem nkaus xwb tab sis nws yeej tsis muaj tswv yim dab tsi yuav los nrog daws tej teeb meem no li. Yog tias koj twb tsis muaj peev xwm npaj lub neej pem suab thiab tseem ntshai lub neej pem suab li Peter Dutton ntshai, ces yeej tsis muaj peev xwm yuav tsim tau lub neej pem suab raws li qhov Australia xav tau.''

Pab nom koom tswj hais tias tsoom fwv Labor tej tswv yim daws teeb meem huab cua pauv hloov yuav tsis muaj peev xwm yuav los ua tau raws li tej hom phiaj 43 feem pua uas yuav tsis tso pa tsis huv paug tsuas rau tej ib puag ncig xyoo 2030. Thiab nws yuav ua kom tau tej hauj lwm no tiav rau xyoo 2050.

Tsis tas li ntawd los 'nws kuj cav tias yuav ua rau muaj teeb meem rau Australia tej lagluam', thiab nws yuav thim tsis ua raws li tej hom phiaj no, tab sis kuj tseem yuav ua raws li pej kum haiv cov kev pom zoo Paris Agreement.

Thiaj uas rau Professor John Hewson uas yog ib tug zeskais qhia ntawv ntawm tsev kawm qib siab Australian National University thiab yog tus coj pab nom Liberal party dhau los hais tias pab nom koom tswj lub tswv yim no pab tsis tau Australia dab tsi.

Nws hais tias ''Kuv yeej tsis pom zoo nrog tej lus lawv tau hais tias Australia yuav tsis ua raws cov kev pom zoo Paris Accord, thiab tam sim no lawv tab tom cuam tshuam nrog tsoom fwv tej tswv yim pab kom peb tig mus siv tau cov renewable energy system coj los tsim hluav taws xob siv. Lawv yuav tsum tso tseg lub tswv yim uas pheej yuav ua kom tau txais txiaj ntsim sab laj fai kum xeeb sai sai rau lawv xwb. Nws pheej yuav yuam thiab yuav hawv li ub li no, thiab pheej xav tias nuclear energy thiaj yuav pab Australia kom tsis txhob tso tej pa tsis huv paug tsuas rau tej ib puag ncig tau. Vim yog tej siv sij hawm ntev thiab kim heev. Ces thiaj yuav ua rau tej zejzog xav paub tias nws yuav ua li cas tiag.''

Txawm li cas los raws li Australia lub koom haum teeb txheeb CSIRO tau qhia tsis ntev los no, ces yeej pom tias siv tej renewable energy yeej pheej yig dua, thiab yog tseem siv nuclear energy tsim hluav taws xob siv ces yuav kim tshaj tej renewable energy txog li ob npaug.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.