Pawg neeg Women's Economic Taskforce hais tias tseem muaj ntau yam ua rau Australia tej poj niam tsis muaj peev xwm ua hauj lwm ces thiaj yuav ua rau muaj teeb meem rau tag lawv ib sim neej. Tej ntawd ces yog poj niam yuav tau ua tej hauj lwm uas tu thiab siab xyuas lwm tus, tab lub cuab yig, thiab zov me nyuam ntau dua. Thiaj ua rau lawv tsis muaj peev xwm yuav mus ua tau hauj lwm kom siv tau lawv tej txuj ci thiab lub tsab peev xwm kom puv npo. Tej no thiaj ua rau lawv ntsib teeb meem nyuaj ntau yam tsis hais yog lub neej koom nrog zej tsoom los sis yog lub neej ntiag tug, ua rau lawv txom nyem nyiaj txiaj, ua rau lawv tau nyiaj super tsawg siv thaum so tsis ua hauj lwm, ua rau lawv ras los ua cov neeg tsis muaj vaj tse nyob, thiab pheej yuav tau tos lwm tus nyiaj txiaj siv.
Tsis tas li ntawd los kuj tseem txheeb tau tias tseem muaj cov kev siv tej tswv yim qub qub li pheej tseem cia txiv neeg yog tus txiv tsev khwv nyiaj los pab lub cuab yig, hos cia poj niam tu tub ki thiab tab cuab yig uas siv tsis tau zoo rau kee tiam 21 no lawm.
Txuas ntxiv ntawd los tseem muaj tej txiv neej neeg Australia tseem muaj cov kev xav uas tsis ntseeg tias muaj kev tsis tau txais vaj huam sib luag rau poj niam thiab. Ces thiaj tseem muaj tej teeb meem kub ntxhov rau Australia tej poj niam me nyuam ntau tuaj ntxiv, thiab tsis kub siab nrog daws kom tej poj niam khwv tau nyiaj siab npaug li txiv neej.
Tej no thiaj tau ras los ua ib cov teeb meem loj heev rau Australia tej poj niam vim txhua yam cai tsim los pab Australia tej lagluam yeej tsis kub siab nrog xyuas ntau yam teeb meem uas tau muaj rau Australia tej poj niam. Ces thiaj ua rau Australia tej lagluam poob nyiaj txiaj txog li ntawm AUD 128 billion dollars.
Yog li ntawd pawg neeg Women's Economic Taskforce thiaj tau muaj ib co lus taw qhia rau tsoom fwv Albanese kom tsim kom tau cov paid parental leave 52 limtiam (1 xyoos) siv, nqes peev tsim kom muaj tej chaw qhia thiab zov me nyuam early childhood educational centres los yog tej childcare centres kom ntau tuaj ntxiv, thiab qhov tseem ceeb ces tsim kom tau cov free universal childcare siv, kom thiaj daws tej tej teeb meem tsis tau txais vaj huam sib luag rau cov kev khwv nyiaj ntawm poj niam thiab txiv neej uas tsis kub siab txog los tau ntau caum xyoo lawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab Downloadthiab caum
