Xov xwm luv tshaj tawm rau hnub zwj Quag (Tuesday tim 23.01.2024):
Tsoom fwv teb chaws Australia qhia tias nws tau siv lub fwj chim cyber sanction power thawj zaug, thiab tau los teev txog Aleksandr Emrakov uas yog tus neeg Russia uas tau tsim teeb meem cyber attack rau lub tuam txhab Medibank Private uas ua rau tej customers ze txog 10 million tus tej xov xwm ntiag tug li npe, xov tooj, thiab hnoob nyoog paim quav thiab coj mus tso hauv dark web. Nom tswv tau txwv tias yog leej twg tseem pab nyiaj thiab peev txheej suav cryptocurrency rau tus neeg no thiab ces yuav raug rau txim kaw tsev laj cuj 10 xyoo.
Tsoom fwv teb chaws Australia tau qhia tias nws kuj tau rau txim ntxiv rau 12 tug neeg thiab 3 lub koom haum Hamas, Hezbollah thiab Palestinian Islamic Jihad uas cuam tshuam nrog cov kev tua neeg kom pej xeem ntshai. Raws li tsoom fwv cov kev txwv tshiab no ces yog tus twg tseem tshwm nyiaj pab tej koom haum no, thiab muaj feem tswj lawv tej peev txheej ces yuav raug nplua hnyav los yog raug rau txim kaw tsev laj cuj txog li 10 xyoo.
Meskas lub tuam chav tiv thaiv teb chaws thiab Aaskiv tau qhia tias nws tau koom tes nrog teb chaws Aaskiv mus tawm tsam nrog cov neeg Houthi rau 8 qhov chaw tshiab ntawm teb chaws Yemem lub tuam ceeb Sanaa, uas tau txais kev pab phab tug rog los ntawm ntau lub teb chaws li Australia, Bahrain, Canada thiab Netherlands.
Nom tswv xeev Queensland tau qhia tias lub khaub zeeg cua Kirily tau ntaug zog lawm tab sis yeej tseem muaj cov kev ceeb toom tias tseem muaj cua hlob, ntuj los nag hlob thiab tej zaum tseem yuav muaj dej nyab rau lub caij uas Steven Miles uas yog Queensland tus hau xeev tau ua tus tswj pawg rooj saib xyuas tswj xwm txheej ntuj tsim kev puas tsuaj tseem nrhiav tswv yim tias seb yuav los daws tej xwm txheej uas lub khaub zeeg cua no tsim li cas rau lub caij uas lub khaub zeeg cua no los rau lub xeev no tej ntug hiav txwv sab hnub tuaj.
Thawj pwm tsav Anthony Albanese hais tias 'sawv daws' yeej yuav tau txais kev txo se rau lub caij nws tseem los txheeb txog cov kev txo se theem peb uas muaj kev cov nyom. Hnub tim 23.01.2024 no ces tsoom fwv pawg nom tseem ceeb kuj tab tom sab laj seb puas yuav pib txo se thiab siv ib tug se rau tej neeg ua hauj lwm uas khwv tau nyiaj txij $45,000 mus txog $200,000 rau ib xyoos twg. Tab sis raws li tau muaj kev cej luam ntawm chaw nthuav xov xwm tshooj 9 thiab ABC ces tej zaum tej neeg khwv tau nyiaj tsawg dua $45,000 los kuj yuav tau txais kev txo se thiab uas thaum xub tsis suav nrog.
Tau muaj ib lub suab cuav uas ua txoj dag tias yog Meskas tus President Joe Biden tau nqua hu kom tej neeg xaiv nom ntawm xeev New Hamshire tsis txhob mus xaiv nom ntawm lub xeev no, thiab qhia kom tej neeg xaiv nom npaj lawv cov suab xaiv nom tos xaiv nom teb chaws rau lub 11 hlis ntuj thiab tsis txhob mus xaiv nom rau hnub zwj Quag (Tuesday) no vim yuav ua rau Republican yuav rov qab xaiv Donald Trump dua ib zaug ntxiv.
Riyad al-Maliki uas yog Palestinian tus nom txawv teb chaws uas tau mus koom lub rooj sab laj MidEast EU meeting ntawm Brussels xav kom EU tej nom hais kom xaus tsov rog ntawm Gaza thiab tsis pom zoo nrog Israel tus thawj pwm tsav Benjamin Netanyahu cov kev tsis pom zoo tsim ob lub teb chaws Palestine thiab Israel.
The Laotian Times tau tshaj tawm tias Japan tau ras los ua ntiaj teb lub teb chaws zum tsib uas tau xa hnub qub cuav mus tsawg saum hli lawm.
Socceroos tus coach Graham Arnold hais tias nws tau hloov Australia cov neeg sib tw ncaws pob thiab cia siab tias yuav tsis muaj teeb meem dab tsi tom qab uas Australia tau sib tw yeej thawj ob co kev sib tw nrog India thiab Syria, uas nws tsuas sib tw kom yeej sib npaug nrog Uzbekistan hmo no xwb ces yeej ua rau Australia yog pab sib tw tau zoo tshaj plaws rau cov kev sib tw Asian Cup thiab Qualified lawm.
Spain tus hluas Carlos Alcaraz uas nyog ntiaj teb tus txiv neej ntau pob tennis tshaj lij zum ob kuj tau mus sib tw quarterfinal rau cov kev sib tw Australia Open lawm tom qab nws muaj peev xwm sib tw yeej Serbia tus neeg Miomir Kecmanovic ces thiaj ua rau nws tau mus sib tw txuas ntxiv nrog Alexander Zverev lawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
