Hmoob pawg ntseeg ntawm Melbourne

Xibfwb Tswv Kub Hawj tawm tswv yim txog tias vim li cas thiaj xav npaj kom tau ib qho chaw ua kev teev hawm rau nws pawg ntseeg Hmong Melbourne Alliance Church (HMAC) thiab nws xav li cas rau Meskas lub xeev Louisiana 10 nqe cai ntawm tej phiaj yuav coj mus tsa ntawm txhua lub teej kawm.

Credit: Tswv Kub Hawj

Xibfwb Tswv Kub Hawj tau qhia rau SBS Audio Hmong program tias nws nyuam qhuav teeb tsa tau pawg ntseeg Hmong Melbourne Alliance Church (HMAC) ntawm nroog Melbourne lub 2 hlis ntuj (2024) dhau los no.

Nws hais tias 'Kuv lub hom phiaj ces yog tsim tsa kom muaj pawg ntseeg, thiab nrhiav qhov chaw hawm vaj tswv rau pawg ntseeg.''

Xibfwb qhia tias tam sim no ces muaj tej tub koom siab ntawm pawg ntseeg HMAC 'txog li 40 leej' lawm thiab tau mus ntiav neeg Australia ib lub tsev teev hawm siv rau hnub zwj Hnub (Sunday 13:00-15:30) tom qab tav su dua xwb.

Xibfwb Hawj hais ntxiv tias 'Peb lub headquarter nyob Canberra yeej tshwm nyiaj pab ntiav chaw teev hawm rau peb thiab kuj tau tej nyiaj uas tej tub koom siab pab coj los pab ntiav qhov chaw teev hawm rau pawg ntseeg siv thiab.'

Nws qhia tias pawg ntseeg ntawm Melbourne no los kuj muaj cov kev ntseeg tib yam li lwm pawg ntseeg thiab uas yog ntseeg Protestantism uas lub hauv paus loj ces yog cov neeg ntseeg ntawm lub koom haum Christian and Missionary Alliance of Australia (CMAA). Thiab nws tau ntawv pov thawj ntawm lub koom haum no ntawm Canberra los ua xibfwb rau pawg ntseeg no.

Xibfwb Tswv Kub Hawj kuj qhia tias nws yeej pom zoo nrog Meskas lub xeev Lousiana lub tswv yim teev 10 nqe lus zoo ntawm tswv ntuj rau tej phiaj uas yuav coj mus nruab rau txhua lub teej kawm ntawm lub xeev no.

Nws hais ntxiv tias 10 nqe lus ntawd ces yog 'yuav tsum pe hawm vaj tswv xwb tsis txhob hawm lwm tus vaj tswv, thiab yuav tsum saib taus vaj tswv lub koob lub npe tsis txhob hais ua dog ua dig, yuav tsum hwm hnub so Sabbath uas yog hnub tseem ceeb, thiab yuav tsum hwm niam hwm txiv, yuav tsum tsis txhob ua tub sab tub nyiag, tsis txhob tua tib neeg, tsis txhob ua kev nkauj kev nraug (tsis txhob ua kev plees kev yig), tsis txhob ntshaw luag tug, tsis txhob ua tim khawv tsis tseeb.'

'Raws li hauv vaj lug kub hais no ces thaum ub vaj tswv muab ntiv tes sau (10 nqe lus no) rau ib daig txiag zeb rau Moses,' raws li xibfwb Hawj tau hais ntxiv.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.