Tej lus tawm tswv yim txog cov kev kho tsab cai Migration Act

Australia tej neeg zejzog coj ntseeg ntau yam kab lis kev cai thiab hais ntau hom lus xav li cas rau tsoom fwv cov kev tab tom sab laj txog tsab cai migration act ntawm tsev kis xeev siab?

Source: SBS

Australia tej neeg zejzog coj ntseeg ntau yam kab lis kev cai thiab hais ntau hom lus qhia tias lawv muaj kev txhawj xeeb heev txog tsoom fwv teb chaws Australia cov kev tab tom npaj los kho tsab cai migration act ntawm tsev kis xeev siab (Senate).

Yog tias muaj peev xwm kho tau tsab cai no tshiab coj los siv, ces tej zejzog txhawj tias 'tsam lawv yuav raug kaw yam tsis paub tias hnub twg thiaj yuav raug tso, thiab tej zaum yuav yog ib cov kev muab tej cuab yig sib cais.'

Tsis tas li ntawd los raws li lub koom haum Asylum Seekers Resource Centre hais ces nws txhawj tias 'tsam yuav ua rau Australia tus nom tswj dej num tsiv teb tsaws chaw muaj fwj chim tam li yog ib tug tswv ntuj uas yuav txiav txim ib tug neeg twg lub neej, lub fwj chim no tsis yog ib lub fwj chim raws cov kev tswj hwm democracy thiab yog lub fwj chim nom tswv nruj tsiv.'

Yog tias kho tau tsab cai no tshiab coj los siv ces yuav ua rau Australia tus nom tswj dej num tsiv teb tsaws chaw muaj cai tshem thiab tsis teev ib co teb chaws raug teev npe tias yog muab tej neeg thoj nam xa rov qab yuav raug teeb meem ntawm lawv tej qub teb chaws thiab tej zaum yuav ua rau tsoom fwv lug hla nws lub luag hauj lwm los txheeb thiab pov puag ib tug twg tam li yog neeg thoj nam lawm thiab los kuj tau. Thiab tej zaum tej neeg ntawm ob lub teb chaws Iran thiab Iraq yuav tsis muaj peev xwm thov tau nyob ruaj ntawm Australia ntxiv lawm.

Tania Naseri thiab nws tsev neeg yeej tau tsiv tawm ntawm teb chaws Iran tuaj rau Australia uas qhia tias 'nws yeej ntshai rwg tias tsam muaj ib hnub twg nws yuav raug muab xa thiab ntiab rov qab mus rau nws lub teb chaws uas nws yuav raug teeb meem.'

Pab nom Greens tus nom kis xeev siab David Shoebridge los yeej qhia tias tsis muaj peev xwm yuav kho tau tsab cai no siv thiab kom tso tseg tsis txhob siv tsab cai no vim yuav ua rau Australia tej neeg zejzog ntau yam sib txawv muaj txoj kev ntshai thiab yog ib cov kev faib cais lwm tsav neeg.'

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.