Australia tus coj caw kom Xi Jinping tuaj xyuas Australia

Xov xwm luv tshaj tawm hnub zwj Quag (Tuesday newsflash 07.11.2023).

Studio Source: SBS

Thawj pwm tsav tau hais tias nws cov kev mus xyuas Suav tuam tshoj thiab tau nrog Suav tus coj Xi Jinping tham 'yog ib cov kev sib tham tseem ceeb'. Nws kuj tau caw kom Suav tus coj tuaj xyuas teb chaws Australia. Nkawv cov kev sib tham no yog muaj hom phiaj kho kom muaj kev sib raug zoo phab nom tswv ntawm ob tog, xyuas kom Suav tso tseeg tsis txhob tsub se rau Australia tej khoom lagluam xa muag rau Suav thiab tham txog Suav cov kev hwm leej tib neeg txoj cai thiab kev ruaj ntseg rau cheeb tsam Taiwan Strait thiab lub zog tub rog ntawm cheeb tsam Indo-Pacific.

Lwm pab nom teb chaws xav kom tus tsoom fwv Albanese kub siab tshaj no los nrog tswj tus kab theem nyiaj poob nqe rau lub caij tim 7.11.2023 hnub Melbourne Cup uas tej economists kwv yees tias tej zaum Reserve Bank of Australia pawg tswj yuav nces kab theem paj ntxiv 0.25 feem pua uas yuav ua rau tus kab theem paj nyob rau ntawm 4.35 feem pua.

Tsoom fwv Biden kuj tau xa nws pab nom tuaj rau tuam cheeb Canberra tuaj txheeb xyuas tias seb tsoom fwv Australia ho ua tau tej hauj lwm AUKUS agreement uas pom zoo yuav Meskas tej nkoj nuclear submarine li cas lawm. Cov kev sib khom pom zoo ntawm peb tog li Australia, America thiab Aaskiv yog ib cov hauj lwm tiv thaib teb chaws tseem ceeb tshaj plaws ntawm Australia tej keeb kwm uas yuav tswj kev ruaj ntseg rau cheeb tsam Indo-Pacific thiab cheem Suav tuam tshoj lub zog tub rog.

UN tej coj ntawm tej cuam chav tseem ceeb 18 lub tau tshwm ib cov ncauj lug nqua hu kom cia li xau cov tsov rog ntawm Gaza kom thiaj coj tau tej khoom pab cuam mus pab rau tej neeg rau lub caij uas Israel cov kev tawm tsam Gaza no twb ua rau muaj tej neeg tas sim neej coob tshaj 10,000 tus lawm.

Russia tau xa drone mus tua Ukraine lub tsev huab tais uas qub tshaj plaws thiab tau ua rau raug kev puas tsuaj loj heev.

Bangkok Post tau tshaj tawm tias lub hli tom ntej no ces tej neeg Thaib yuav kwv tau nyiaj hauj lwm ib hnub twg yam tsawg li 328 txog 354 Baht lawm.

Vientiane Times tau tshaj tawm tias txog rau thaum yuav xaus xyoo 2023 no ces lub tshav dav hlau Bokeo yuav pib qhib siv lawm.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.