Ntsiab lus tseem ceeb:
- Tej zaum yeej yog tim yus tus kheej los yog muaj lwm yam cuam tshuam thiaj ua rau yus los yog ib tug twg tsav tsheb ua lwj ua liam thiab ua rau lwm tus chim los yog npau taws.
- Thiaj xav kom tsis txhob ua pauj lwm tus yog tias lwm tus ho coj tej cwj pwm ntawd rau yus.
- Kom xam pom txog qhov zoo ntawm lwm tus thaum lawv ua ib yam dab tsi yuam kev lawm.
Cov kev muaj cai tsav tau tsheb yeej yog tej yam uas yus yuav tsum tau hwm lwm tus neeg tsav tsheb thiab.
Tab sis tej uas qee tus neeg tau ua thaum lawv tseem tsav tsheb thiab npau taws los yog meem txom heev ntawd kuj yuav ua rau lwm tus muaj kev txhawj xeeb ntawm tej kev thiab tej zaum kuj yuav ua rau raug kev phom sij tsis tau txais kev nyab xeeb ntawm tej kev tsheb.
Txawm tias yeej tsis muaj nom tswv tej statistics uas teeb txog tej xwm txheej road rage, los raws li lub koom haum Finder xyoo 2024 hais, ces yeej muaj 3 tug ntawm 4 tug neeg Australia twg ntsib tej xwm txheej no rau lub caij tseem tsav tsheb.
Ib tug poj niam siab luv tsa nws txhais tes thaum tseem tsav tsheb rau lub caij muaj tsheb coob heev ntawm nroog. Credit: freemixer/Getty Images
Nws hais tias tej zaum yog tim ntiag tug cov kev ntseeg los yog yus cov kev xav tsis ncaj rau lwm tus, los yog ib co kev xav rau poj niam txiv neej los yog ib tug neeg tsav tsheb twg lub hnoob nyoog thiaj ua rau yus coj tej cwj pwm ua nruj ua tsiv rau lub caij tseem tsav tsheb.
''Piv txwv li pheej ua rau yus ntseeg tias yog lwm tus neeg tsav tsheb txhob txwm ua rau yus tom tej kev; li lawv txhob txwm tsav tsheb ceev ceev los hla los yog txiav kiag ntawm yus hauv ntej.''
Tsis tas li ntawd los tej zaum kuj muaj lwm yam sab nraud muaj feem xyuam thiab los kuj tau.
“Lub sij hawm kuj yog ib yam tseem ceeb heev. Yog tham txog tej neeg uas yuav tau maj mus ntawm ib qho chaw mus kom txog rau lwm qhov chaw, thiab yog tias lawv tseem daig rau ntawm tej teeb tswj siv kev tsheb los yog tsheb coob heev thiab ces tej zaum kuj yuav ua rau lawv coj tej cwj pwm uas uas rau lwm tus neeg tsav tsheb chim thiab npau taws.''
Ces tsis hais tej cwj pwm dab tsi li uas ua rau ib tug neeg tsav tsheb twg coj tej cwj pwm uas yuav ua rau lwm tus neeg tsav tsheb chim thiab npau taws ces tej zaum yeej yuav ua rau muaj cov kev tsav tsheb tsis tau txais kev nyab xeeb thiab pheej ua rau tus neeg tsav tsheb ntawd xav tias nws yeej muaj peev xwm tswj tau nws cov kev tsav tsheb zoo.
Professor Kirby tshab txhais tias “Thaum peb chim, ces zoo li peb tij lim tsav tsheb heev, thiab peb yuav coj cwj pwm zoo tib yam li tus neeg tshav tsheb tsis raws cai lawm. Thiab lub caij ntawd ces pheej ua rau peb ntseeg tias zoo li peb niam muaj peev xwm tshav tau tsheb zoo heev ces haj yam ua rau peb coj tej cwj pwm tsav tsheb phom sij tuaj ntxiv. Vim rau qhov pheej ua rau peb mloog tau tias zoo li peb niam txawj tsav tsheb dua lwm cov neeg tsav tsheb ntawm tej kev.''
Ib tug txiv neej npau taws heev tawm tsam nrog lwm tus txiv neej tsav tsheb uas tseem zaum hauv ib lub tsheb. Credit: DjelicS/Getty Images
Tej cwj pwm pom muaj tas mus li uas ib tug neeg tsav tsheb twg pheej ua rau lwm tus neeg tsav tsheb chim thiab npau taws ces yog tej xwm txheej li txhob txwm tsuj brake kom tsheb nres los yog cia li maj mam nres qeeb kiag tam sim ntawd kom meem txom los yog muaj teeb meem rau lwm tus neeg tsav tsheb, los sis yog pheej caum lwm lub tsheb qab, los sis yog pheej tsav tsheb ceev heev, pheej tsom teeb taw teeb tas los pheej rov qab tsom teeb rau lwm tus neeg tsav tsheb kom zam kev los yog pheem caum thiab tsav tsheb ti ti lwm lub tsheb qab.
Ntawm Victoria no nkaus xwb ces txhua txhua xyoo twg yeej muaj tej neeg raug nplua txog li ntawm 2,000 zaus vim pheej tsav tsheb caum ti ti lwm lub tsheb qab.
James William uas yog tus tswj tej policy ntawm lub koom haum Royal Automobile Club of Victoria (RACV) thiaj qhia tias tailgate yog dab tsi.
“Kuj tsis yog tias lub tsheb ntawd tsav mus ze mus ti ntawm lwm lub tsheb uas tsuas nrug ntau centimetres los yog nrug me ntsis ntawm lwm lub tsheb xwb, tab sis kuj nyob ntawm seb ho muaj dab tsi tshwm sim ntawm tej kev tsheb ntawd. Tab sis yog tias yus pheej tsav tsheb ti ti nrog lub tsheb ua ntej yus ntev rau ib lub caij twg lawm. Ces yeej muaj cai teev tseg tias yog yus tsis tsav kom nrug ntawm qab ntawm ib lub tsheb twg ces kuj yuav yog ib cov kev ua txhaum cai thiab.''
Txawm tias tej xwm txheej uas ib tug neeg tsav tsheb twg uas pheej coj tej cwj pwm ua rau lwm tus neeg tsav tsheb chim thiab npau taws yog ib co kev ua txhaum cai, los tsuas yog tej cwj pwm nruj tsiv uas ib tug twg coj rau lub caij tseem tsav tsheb uas yuav ua rau tsis tau txais kev nyab xeeb rau tom tej kev thiaj li yuav ua rau tus neeg tsav tsheb ntawd raug nplua xwb. Credit: John W. Banagan/Getty Images
Mr Williams hais tias “Yog poob rau theem uas pheej muaj lwm tus neeg tsav tsheb caum yus lawm, ces tsis hais yuav yog lawv ntau yus los yog tsim kev kub ntxhov rau yus li, yog poob rau tej xwm txheej phom sij li no lawm, ces yog tej yam tseem ceeb uas yus yuav tau hu rau tub ceev xwm los yog yuav tau nrhiav ib qho chaw tau txais kev nyab xeeb nres yog pheej ua rau yus mloog tau tias yus tsis tau txais kev nyab xeeb thiab yus tsis muaj peev xwm yuav tsav tsheb lawm.''
Thiab yog yus raug lwm tus ua li no rau yus, ces yuav tau tswj yus tus kheej kom tus thiab tshem yus tus kheej tawm ntawm tej xwm txheej no li zam kev rau lwm tus neeg tsav tsheb hla yus mus ua ntej los sis yog nrhiav ib qho chaw nyab xeeb nres yus lub tsheb.
Mr Williams thiaj hais ntxiv tias ''Yog tej yam tseem ceeb uas yus tsis txhob coj ib yam cwj pwm twg uas yuav ua rau haj yam muaj tej xwm txheej no kuv ntxhov tshaj qub ntxiv.''
Road rage thiab insurance
Raws li ib txwm pom ces ib hom car insurance twg yeej yuav pab them tej khoom puas vim ib tug neeg tsav tsheb twg coj tej cwj pwm ua rau lwm tus neeg tsav tsheb chim thiab npau taws.
Tim Bennett uas yog tus kws paub zoo txog insurance ntawm lub koom haum Finder hais tias feem ntau mas yog tus neeg txhaum ntawd lub tuam txhab insurace yog tus them tej nqe no. Nws thiaj qhia qee yam uas yuav tau ua tom qab tau muaj tej xwm txheej no.
Mr Bennett hais tias “Qhov zoo tshaj ces ... ob lub tsheb cuam tshuam ntawd yuav tsum tau nres thiab sib qhia nkawv tej xov xwm. Tab sis yog tias tsis muaj peev xwm ua tau li hais ntawd vim yog ib tog twg pheej coj tej cwj pwm nruj tsiv, ces yuav tau sau ntawv teev tseg tias tau muaj dab tsi tshwm sim kom sai npaum li sai tau tseg cia. Thiab yam tsawg ces yuav tau teev kom tau lwm lub tsheb tus licence plate number kom sai npaum li sai tau raws li qhov yus muaj peev xwm ua tau.''
Tej neeg cai tsheb kauj vab thiab tej neeg taug kev kuj yog tej neeg uas tej zaum yuav raug teeb meem los ntawm tej cwj pwm tsav tsheb uas rau lwm tus neeg tsav tsheb chim thiab npau taws thiab. Credit: olaser/Getty Images
Mr Bennett tshab txhais tias “Kuv xav tias yeej muaj laj thawj zoo txaus lawm. Yog tias yus yog tus txhaum rau ib co xwm txheej tsheb sib nraus twg los yog ib co xwm txheej uas yuav tau them nyiaj insurance, ces yuav ua rau yus tau them cov insurance premium kim tuaj ntxiv. Tab sis kuj yog tej yam tsis muaj hmoo uas kuj yuav raug tau tej teeb meem no rau tus neeg uas lwm tus tsim teeb meem rau nws thiab yog tias nws mus claim insurance ces tej zaum kuj yuav ua rau nws yuav tau them insurance kim ntxiv thiab. Piv txwv li yuav ua rau nws tsis tau cov no claim bonus ntxiv lawm, tab sis kuj tsuas nyob ntawm seb yus lub tuam txhab insurance ho zoo li cas xwb thiab.''
Yog tias yus ho yog ib tug neeg koom caij ib lub tsheb ne ho yuav ua li cas?
Yog yus ho yog ib tug neeg koom caij lub tsheb uas tus neeg tsav lub tsheb ntawd coj tej cwj pwm no ces kuj yog tej yam ua rau yus ntxhov siab kawg li thiab.
Professor Kirby tshab txhais tias “Vim ua rau yus tsis muaj peev xwm ua tau dab tsi li. Thiab txawm yus txoj siab yeej tseem ceeb los tej zaum kuj yuav raug kev phom sij tsuas nyob ntawm seb tus neeg ntawd ho coj cwj pwm li cas xwb.''
Thiab kuj muaj ntau yam cuam tshuam tsuas nyob rau ntawm seb yus ho muaj kev sib raug zoo npaum li cas nrog tus neeg tsav tsheb ntawd xwb thiab.
“Yog hus pheej siv lo lus 'calm down' ces tej zaum lwm tus yuav tsis tshua kub siab lawm, thiab tej zaum haj yam ua rau nws chim tshaj qub ntxiv xwb.''
Yog li nws thiaj xav kom qhia tias tej xwm txheej no yeej tsim nyog ua rau nws chim li siv los lus tias 'that was terrible' los yog 'that looked difficult'.
Tam li yog ib tug neeg koom caij tsheb ces yus yeej muaj peev xwm siv tau ntau yam tswv yim los tswj kom tus neeg tsav tsheb coj cwj pwm tus rau lub caij uas lwm tus ua rau nws npau taws, tab sis tsuas nyob ntawm seb yus ho muaj kev sib raug zoo npaum li cas nrog nws xwb thiab. Credit: PixelsEffect/Getty Images
''Thiab tej zaum yus kuj tawm tswv yim pab tus neeg tsav tsheb, tsuas nyob ntawm seb yus ho paub tus neeg ntawd zoo npaum li cas li. 'Puas kam qhib xov tooj cua mloog?' los yog 'Peb tsav tsheb kom dhau tus neeg no mus puas tau?', los sis yog 'koj puas xav nres tsheb me ntsis tso?''
Tab sis qhov tseem ceeb tshaj plaws ces txhua zaus uas yus tsav tsheb ntawd yuav tsum tau tij lim thiab totaub tias yus tab tom ua dab tsi mas thiaj li yuav tau txais kev nyab xeeb los sis yog ib cov kev tsav tsheb raws li qhov tsim nyog tsav.
Professor Kirby hais tias “Yog tej yam tsis muaj hmoo uas yog yus ua yuam kev rau tom kev tsheb ces yuav raug kev phom sij, vim muaj tej thaum ces tej zaum yus ua dhau zog lawm thiab. Yog li kuv thiaj xav taw qhia kom tsis txhob rawm maj txiav txim rau lwm tus thiab yuav tsum ua tib zoo xyuas kom yus zam txim npaum li qhov yus muaj peev xwm zam rau lwm tus. Thiab tsis tas yuav ua pauj lwm tus.''
Professor Kirby hais tias yog tias ib tug neeg uas tab tom tsav tsheb ntawm tej kev twg pheej coj tej cwj pwm ua rau lwm tus chim thiab npau taws, ces cov kev pab sab laj tawm tswv yim daws kuv nyuaj siab ntxhov plawv kuj yuav muaj peev xwm pab tau nws tswj thiab qhia txog nws cov kev chim tau thiab. Source: Moment RF / Fiordaliso/Getty Images
Tsis tas li ntawd los kuj muaj peev xwm hu rau Crimestoppers tus xov tooj 1800 333 000 qhia rau nom tswv paub yog tias ib tug twg coj tej cwj pwm tsav tsheb tsis zoo no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab. Downloadthiab caum
