លោកនាយករដ្ឋមន្ត្រី ហ៊ុន ម៉ាណែត បញ្ជាក់ថា នេះជាគោលការណ៍មនុស្សធម៌ ដែលត្រូវយកចិត្តទុកដាក់ចំពោះប្រជាពលរដ្ឋកម្ពុជាយើង។
( សំឡេង )
គួរបញ្ជាក់ថា កម្មវិធីឧបត្ថម្ភសាច់ប្រាក់ ជូនស្ត្រីមានផ្ទៃពោះ និងកុមារក្រោមអាយុ ២ឆ្នាំ ក្នុងគ្រួសារក្រីក្រ ត្រូវបានរាជរដ្ឋាភិបាល ដាក់ឱ្យអនុវត្ត ចាប់តាំងពីខែមិថុនា ឆ្នាំ២០១៩។ ក្នុងនោះ ស្ត្រី ដែលមានផ្ទៃពោះ ទទួលបានប្រាក់ឧបត្ថម្ភពីរាជរដ្ឋាភិបាល ដោយពេលពិនិត្យផ្ទៃពោះថែទាំមុនសម្រាល ចំនួន ៤លើក ទទួលបានប្រាក់ឧបត្ថម្ភចំនួន ៨ម៉ឺនរៀល ក្នុង ១លើក។ ពេលសម្រាលកូន នៅមូលដ្ឋានសុខាភិបាលសាធារណៈ ឬនៅមន្ទីរពេទ្យរដ្ឋ ដោយមិនគិតថ្លៃ ហើយទទួលបានការឧបត្ថម្ភ៖ ចំពោះកូនទោល ទទួលបានថវិកា ៤០ម៉ឺនរៀល។ ចំពោះកូនភ្លោះ ទទួលបានថវិកា ៦០ម៉ឺនរៀល។ ចំពោះកូនភ្លោះបី ទទួលបានថវិកា ៨០ម៉ឺនរៀល។ ក្នុងនោះ ការថែទាំក្រោយសំរាល ទាំងម្ដាយ និងកូនចំនួន ៣លើក ដោយទទួលបានប្រាក់ឧបត្ថម្ភចំនួន ៨ម៉ឺនរៀល ក្នុង ១លើក។ ការថែទាំទារក រហូតដល់អាយុ ២ឆ្នាំ ចំនួន ៧លើក ដោយទទួលបានប្រាក់ឧបត្ថម្ភចំនួន ៨ម៉ឺនរៀល ក្នុង ១លើក។
ជាសរុប ស្ត្រីមានផ្ទៃពោះ រហូតដល់កូនអាយុ ២ឆ្នាំ ក្នុងគ្រួសារក្រីក្រ ត្រូវបានរាជរដ្ឋាភិបាលកម្ពុជា ឧបត្ថម្ភថវិកាសរុប ១៥២ម៉ឺនរៀល ស្មើប្រមាណ ៣៧០ដុល្លារសហរដ្ឋអាមេរិក។
តាមការចុះជួបទណ្ឌិត និងពិរុទ្ធជនជាស្ត្រី ដែលជាប់ឃុំនៅក្នុងពន្ធនាគារ របស់ក្រុមប្រឹក្សាជាតិ ដើម្បីស្ត្រី នៅក្នុងខេត្ត ចំនួន៧ នៅកម្ពុជា ដើម្បីស្វែងយល់ពីស្ថានភាព និងផ្ដល់សេវាជំនួយផ្សេងៗ ក្នុងចំនួនស្ត្រីដែលជាប់ឃុំឃាំងនៅពន្ធនាគារនៅកម្ពុជា គឺមានស្ត្រីមានផ្ទៃពោះ ចំនួន ២៧នាក់ និងស្ត្រី ដែលមានកូនរស់នៅតាមម្ដាយក្នុងពន្ធនាគារ ចំនួន ១១៥នាក់៕
