Tej kev taw qhia txog cov kev pauv hloov rau Australia tej visas xyoo 2024-25

Raws li tsoom fwv teb chaws tej tswv yim tswj tej dej num tsiv teb tsaws chaw (Migration Strategy), ces yuav txo tej hnoob nyoog rau ib txhia visas kom qes thiab yuav tsim ib cov program coj los txheeb tej neeg thov visas siv rau lwm cov visas.

A range of new measures will affect visa holders from 1 July. Credit: SBS

Lub 12 hlis ntuj xyoo 2023 ces tsoom fwv teb chaws tau qhia tias yuav muaj ib co kev pauv hloov rau tej visa raws li nws tej tswv yim tshiab siv coj los tswj cov kev tsiv teb tsaws chaw uas yuav ua rau muaj teeb meem rau tej neeg uas tseem tab tom kawm ntawv tam sim no ntawm Australia, los sis yog tej neeg tseem tab tom ua hauj lwm tam sim no ntawm Australia thiab tej neeg uas tseem xav thov tej visa siv.

Tsoom fwv hais tias tej tswv yim coj los tswj tej kev tsiv teb tsaws chaw tuaj rau Australia yuav pab kom siv tau tej system no zoo, pab nrhiav kom tau neeg ua hauj lwm thiab nrhiav tau tej txuj ci uas Australia tsis muaj siv thiab pab kom tej neeg ua hauj lwm tsiv teb tsaws chaw tsis txhob raug yuam siv yam tsis raug kev raug cai, ua ke no los 'kuj yuav txheeb txog tej neeg tuaj nyob ruaj ib ntus' nrog rau tej neeg uas thov tau lwm yam visa siv.

Tsis tas li ntawd los yeej tau muaj qee cov kev pauv hloov rau ib txhia visa lawm, tab sis tsoom fwv yeej tseem muaj ntau yam cai uas yuav pib siv txij tim 1 lub 7 hli ntuj xyoo 2024 no mus thiab.

Nod yog tej uas peb paub.

Yuav muaj tej kev pauv hloov dab tsi rau cov visa dab tsi txij tim 1 lub 7 hli ntuj no mus?

• Visa Ballot Process

Tsoom fwv tab tom npaj ib co txheej txheem los xub txheeb ib tug neeg twg ua ntej nws yuav thov ib co visas twg siv.

Txij hnub tim 1 lub 7 hli ntuj mus ces tej neeg ntawm cov teb chaws Suav tuam tshoj, Cob Tsib thiab India uas xav thov cov working holiday visa siv ntawm Australia yuav tsum tau mus thov ib co visa uas muaj tsawg tsawg raws li cov txheej txheem npaj yuav xub txheeb tej neeg thov tej visa no siv ua ntej tso — thiab yuav tau them tej nqe no txog $25.

Yog tias ib tug twg raug xaiv lawm, ces lawv yuav muaj cai thov tau cov Work and Holiday visa (subclass 462) siv.

Yog li ntawd cov txheej txheem xub txheeb tej neeg thaum ntxov no yog yuav siv coj los hloov cov system 'leej twg xub thov ces yuav xub raug txheeb ua ntej', uas tsoom fwv hais tias yuav pab kom tau txais vaj huam sib luag dua thiab siv tau zoo dua.

Vim tias yeej tau npaj cov Work and Holiday visa rau Cob Tsib (Vietnam) txog li ntawm 1,500 daim visas, thiab 1,000 daim visa no rau India uas tseem tsis tau pib. Thiab 5,000 daim visa rau Suav tuam tshoj (China), uas yog ib lub teb chaws ntawm 3 lub uas tau tej visa no ntau tshaj plaws.

Tsis tas li ntawd los kuj yuav siv tej txheej txheem xub txheeb tej neeg India uas paub ua hauj lwm uas xav thov ib daim visa tshiab siv ntawm Australia thiab.

Yuav siv ib co txheej txheem los xub txheeb tej neeg ntawm ntau lub teb chaws li Cob Tsib, Suav tuam tshoj thiab India uas xav thov cov working holiday visas siv. Credit: Hinterhaus Productions/Getty Images

• Ib co visa tshiab rau tej neeg India hluas uas paub ua hauj lwm

Txij tim 1 7 hli ntuj no mus ces tej neeg India uas muaj hnoob nyoog 18 txog 30 xyoo uas muaj txuj ci thiab paub tej hauj lwm technology ntau yam yuav muaj cai thov tau ib co visa tshiab uas ua hauj lwm ib ntus txog li 2 xyoos siv.

Cov program no hu ua Mobility Arrangement for Talented Early-professionals Scheme (MATES).

Cov program no yuav muaj 3,000 daim visa uas xub tsim coj los siv uas xav tau tej neeg muaj ntau yam txuj ci thiab paub ua tej hauj lwm cuam tshuam txog renewable energy, khawb peev txheej (mining), engineering, Information and Communication Technology (ICT), artificial intelligence, financial tecnology thiab agriculture technology.

Tej neeg ntiag tug uas muaj cai thov tau uas raug xub txheeb uas ntej yuav muaj cai thov visa siv yuav tau them nqe thov visa txog li $365.

Tsis tas li ntawd los tej neeg ntawm cov neeg uas xav thov tej visa no siv yuav tsis raug suav nrog 3,000 daim visa uas tau teev tseg thiab.

Ces tej visa no thiaj yog ib Australia thiab India cov kev sib khom pom zoo lub 5 hlis ntuj xyoo 2023 raws li cov hauj lwm Migration and Mobility Partnership Arrangement.

• Tej tub kawm uas tseem kawm ntawm Australia cov kev thov visa siv

Tsoom fwv yuav siv ib co cai tshiab uas yuav ua rau muaj teeb meem rau tej tub kawm pej kum haiv (tub kawm txawv teb chaws) uas twb yeej tau tuaj kawm ntawm Australia no txij xyoo no mus. Tam sim no ces tsoom fwv tseem tab tom los tswj kom nruj tuaj ntxiv tias leej twg yog cov muaj cai yuav muaj peev xwm thov tau cov Student visas siv rau lub caij thaum tseem nyob ntawm teb chaws Australia.

Txij hnub tim 1 lub 7 hli ntuj mus ces ib txhia neeg uas thov cov Visitor visas, Maritime and Temporary Graduate visas yuav tsis muaj cai thov tau Student visa siv ntxiv rau lub caij lawv tseem nyob ntawm teb chaws Australia no ntxiv lawm.

Yog li ntawd tej neeg uas muaj tej visas raws li hauv qab no yog cov uas yuav tsis muaj peev xwm thov tau visa thaum lawv tseem nyob ntawm teb chaws Australia no siv ntxiv lawm.

• Temporary Graduate (subclass 485)
• Visitor (subclass 600)
• Electronic Travel Authority (subclass 601)
• Medical Treatment (subclass 602)
• eVisitor (subclass 651)
• Maritime Crew (subclass 988)

• Temporary Graduate visas

Lub caij siv cov Temporary Graduate visa (TGV) los kuj yuav raug muab txo kom luv tuaj ntxiv thiab kuj yuav siv cov hnoob nyoog tshiab rau tej neeg uas thov tej visa no siv.

Ces thiaj yuav kho cov Temporary Graduate visa (subclass 486) ntawm 4 hom mus ua 3 hom raws li hauv qab no lawm xwb:

1. Graduate Work Stream → hloov ua cov Post-Vocational Education Work stream
2. Post-Study Work Stream → hloov ua cov Post-Higher Education stream
3. Second Post-Study Work Stream → hloov ua cov Second Post-Higher Education Work stream
4. Replacement Stream → tsis siv ntxiv lawm.

Tsuas pub tej neeg thov cov Temporary Graduate visas siv nyob tau luv zog lawm xwb, thiab yuav teev tias tej neeg muaj hnoob nyoog li cas thiaj muaj cai thov tau tej visa no siv. Source: Moment RF / skaman306/Getty Images

Ces thiaj yuav txo lub hnoob nyoog ntawm 50 xyoo los ua 35 xyoos los yog hnoob nyoog qes dua ntawd lawm xwb.

Tom qab tau muaj qee cov kev yoob tias tej kev hloov no yuav muaj teeb meem li cas rau tej tub kawm uas tuaj kawm teeb txheeb uas tuaj kawm masters los yog kawm doctorate (PhD) ces tsoom fwv teb chaws kuj tau qhia meej tias: tej tub kawm uas xav tuaj kawm teeb txheeb yeej tseem muaj cai thov tau tej visa tuaj kawm txog ntua rau thaum lawv muaj hnoob nyoog 50 xyoo. Ces tej neeg Hong Kong thiab tej neeg muaj cov British National Overseas passport kuj yog ib co neeg uas muaj cai thov tau tej visa no siv txog ntua rau thaum lawv muaj hnoob nyoog 50 xyoo thiab.

Tsis tas li ntawd los yeej tsis muaj kev pauv hloov dab tsi rau lub caij uas pub lawv nyob tau ntev npaum li cas yog lawv thov cov TGV

he length of stay doesn't change for holders of a TGV raws li hom Post-Vocational Education Work stream siv — uas yeej tseem siv tau txog li ntawm 1 xyoos 6 hli (18 hli).

Tab sis tej uas thov cov Post-Higher Education Work stream, ces kuj hloov lub caij tias pub lawv nyob tau ntev npaum li cas lawm: li tej neeg ntiag tug uas kawm tiav ib yam bachelor degree twg, suav cov honours, ces tsuas muaj peev xwm nyob tau ntev txog li 2 xyoos. Hos cov kawm masters uas yuav tau kawm los yog xyaum ua hauj lwm ces muaj peev xwm nyob tau ntev tshaj plaws txog li 2 xyoos, hos tej tub kawm uas kawm masters thiab PhD uas yuav tau ua ib co kev teeb txheeb ces tsuas pub nyob tau ntev txog li 3 xyoos lawm xwb.

Tab sis kuj yuav pub tej tub kawm uas thov cov visa TGV nyob tau ntev sib txawv thiab yog tias lawv yog tej uas kawm ntawm ib lub chaw kawm nyob ntawm Australia tej zos nyob tuaj ntug nroog los yog zos toj siab thiab tau nyob rau ntawm tej zos ntawd yam tsawg li ntawm 2 lub xyoos lawm.

Tab sis kuj tsis muaj kev pauv hloov dab tsi rau tej neeg India lub sij hawm uas lawv muaj peev xwm nyob tau li xub siv ua ntej ntawd thiab.

• Temporary skills visas

Kuj tau muaj qee cov kev pauv hloov rau tej lus zoj khi rau tej neeg tsiv teb tsaws chaw uas thov tau ib co visa tuaj nyob ib ntus twg thiab, yuav tsis muaj peev xwm yuav thov tau visa siv ntxiv lawm yog tias lawv tsis ua hauj lwm thiab lawv tus tswv lagluam tsis sponsor lawv ntxiv lawm.

Ces thiaj yuav muaj kev pauv hloov rau tej neeg uas thov tau tej visas li hauv qab no siv:

• Temporary Work (Skilled) (subclass 457)
• Temporary Skill Shortage visa (subclass 482)
• Skilled Employer Sponsored Regional (provisional) (subclass 494)

Thiab tam sim no ces lawv yuav muaj caij nyoog ntev zog ntxiv nrhiav dua ib tug sponsor tshiab, los yog thov dua ib co visa txawv tshiab siv los sis yuav tau npaj tawm ntawm Australia mus:

• muaj caij txog li 180 hnub ib zaug twg, los sis
• muaj caij txog li 365 hnub (1 xyoos) rau lub caij lawv tau visa siv.

Tej neeg thov tau tej visa no siv los kuj tau txais kev tso cai ua tau hauj lwm rau lwm tus tswv lagluam rau lub caij no thiab. Ces thiaj yuav siv cov kev pauv hloov no rau tej neeg uas thov tau tej visa siv tam sim no los yog tej neeg uas thov tau visas siv rau hnub tim 1 lub 7 hli ntuj los yog tom qab ntawd siv.

• Business Innovation and Investment Program (BIIP)

Tsoom fwv yuav tsis siv cov Business Innovation and Investment (provisional) visa (subclass 188) — uas yog ib co visa uas tso cai rau tej neeg thov tau tej visa no siv muaj peev xwm ua tswv tswv los yog tswj ib lub tuam txhab lagluam twg, ua ib yam lagluam twg thiab nqes peev ib yam lagluam twg los yog kawm ua ib yam lagluam twg ntawm teb chaws Australia.

Txij tim 1 lub 7 hli ntuj (2024) no mus ces yuav tsis muaj cov BIIP visa tshiab rau tej neeg thov siv ntxiv lawm. Tab sis yuav muaj cov visa National Innovation rau thaum xaus xyoo 2024 rau sawv daws siv.

Tej neeg uas thov tau cov provisional BIIP (subclass 188) visa siv uas muaj cai thov tau cov subclass 888 siv — uas zoo tib yam li cov neeg thov tau nyob ruaj — ces tseem muaj peev xwm siv tau tej visa no tom qab lub 7 hli ntuj xyoo 2024.

Ho muaj lwm yam kev pauv hloov dab tsi ua ntej xyoo 2024?

• Skills in Demand visa

Tsoom fwv ib cov hauj lwm tseem ceeb uas nws kub siab heev ntawm nws tej tswv yim tswj cov kev tsiv teb tsaws chaw ces yog cov kev tsim cov Skills in Demand visa siv uas yuav coj los siv rau thaum xaus xyoo 2024 no.

Cov Skills in Demand visa yog ib co uas cia siab tias yuav pab kom muaj tej neeg tsiv teb tsaws chaw uas muaj txuj ci thiab paub ua tej hauj lwm green technologies tuaj ua tej hauj lwm no. Credit: Michael Hall/Getty Images

Ces cov temporary skills worker visa 4 xyoos thiab yuav raug coj los siv hloov cov Temporary Skill Shortage visa (subclass 482), uas tam sim no tso cai rau tej neeg thov tau tej visa no siv muaj cai ua tau hauj lwm full-time ntawm teb chaws Australia no yog tias ib tug tswv lagluam twg sponsor lawv.

Thiab yuav muaj cov Skills in Demand visa no siv raws li 3 txoj xub ke raws li hauv qab no:

1. Specialist Skills: yuav xub kub siab txheeb tej neeg uas muaj txuj ci siab thiab paub ua tej hauj lwm cuam tshuam txog technologies thiab green energy industries uas khwv tau nyiaj ntau kom tau tej visa no sai siv.
2. Core Skills: xub kub siab txheeb tej neeg muaj txuj ci thiab paub ua tej hauj lwm uas muaj neeg tsis txaus ua hauj lwm, thiab yuav los npaj kho tej txheej txheej thov visa kom yooj yim thiab tsim ib daim list teev tias xav tau tej hauj lwm dab tsi uas yuav kho tej hauj lwm no tas mus li.
3. Essential Skills: yog cov visa tsim tsi ntsees coj los nrhiav tej neeg uas muaj tej txuj ci tseem ceeb rau ib co lagluam twg li cov kev tu tsom kwm tej laus neeg uas khwv tau nyiaj tsawg.

• A new National Innovation visa

Yog tham txog tej visa no yeej tseem tsis tau muaj xov xwm ntxaws raug coj los nthuav qhia, tab sis yeej tsim tsi ntsees coj los siv rau tej neeg ua kev teeb txheeb tseem ceeb thiab tej neeg nqes peev lagluam tau zoo. Ces thiaj yuav siv cov visa no los hloov ob yam visa li Global Talent visa (subclass 858) thiab BIIP.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.