Nod yog txiv neej khwv tau nyiaj ntau npaum li cas piv rau tej poj niam ntawm tej lagluam loj

Lub koom haum Workplace Gender Equality Agency tau coj thawj tsab ntawv cej luam ntawm teb chaws Australia coj los qhia txog cov kev khwv tsis tau nyiaj sib npaug ntawm poj niam thiab txiv neej ntawm tej lagluam ntiag tug uas muaj tej neeg ua hauj lwm li 100 los yog tshaj ntawd.

The gender pay gap is highest in the construction industry, according to a new report by the Workplace Gender Equality Agency. Credit: SBS

Ntsiab lus tseem ceeb:

• Raws li lub koom haum Workplace Gender Equality Agency tau qhia ces yeej tseem muaj cov kev sib tu ncua rau poj niam thiab txiv neej cov kev khwv nyiaj ntawm haiv neeg no txog li 19 feem pua.
• Tej lagluam txhim kho, khawb peev txheej thiab lagluam services yog cov uas muaj kev sib tu ncua rau cov kev khwv tsis tau nyiaj sib npaug ntawm poj niam thiab txiv neej ntau tshaj plaws.
• Thiab tseem muaj cov kev sib tu ncua nthuav dav tshaj ntawd rau tej lagluam uas pheej yuav tau tos cov bonuses thiab ua hauj lwm overtime.

Ib tug poj niam neeg Australia uas ua hauj lwm twg yeej khwv tau nyiaj tsawg dua 20 feem pua yog piv rau ib tug txiv neej uas ua hauj lwm ua ke, thiab yeej tau nyiaj tsawg dua li ntawm $18,000 rau ib lub xyoo twg yog piv rau tej nyiaj uas tus txiv neej ua hauj lwm ua ke ntawd khwv tau rau rau tib txoj hauj lwm ntawd.

Ua ke no los yeej muaj Australia tej tuam txhab lagluam tshaj 3,000 lub uas tseem muaj tej kev sib tu ncua rau poj niam thiab txiv neej cov kev khwv tsis tau nyiaj sib npaug uas tau txais txiaj ntsim ntau dua rau tej txiv neej thiab.

Tej no yog qee yam ntawm lub koom haum Workplace Gender Equality Agency (WGEA) cov kev teeb txheeb uas tau tshawb fawb tau, thiab yog thawj zaug ntawm cov kev tshawb fawb txog cov kev khwv tsis tau nyiaj sib npaug ntawm poj niam thiab txiv neej ntawm tej lagluam ntiag tug uas muaj tej neeg ua hauj lwm li 100 leej los yog coob tshaj ntawd uas tau coj los cej luam qhia.

Australian thawj tsab ntawv cej luam txog tej tswv lagluam uas tseem muaj cov teeb meem poj niam khwv tsis tau nyiaj sib npaug li txiv neej no yeej muaj lub hom phiaj yuav pab kom daws tau tej teeb meem no li muaj cov kev txhawb nqa kom muaj kev dawb huv rau cov kev khwv tsis tau nyiaj siab npaug no.

Yog li thiaj muaj cov kev khwv tsis tau nyiaj sib npaug raws cov feem pua siab tshaj plaws txog 73.1 uas tau txais txiaj ntsim rau tej txiv neej ntau dua ntawm tej koom haum NGO NSW health care service uas muaj neeg ua hauj lwm tsawg dua 500 leej.

Hos cov lagluam tu tej neeg puas cev ntawm South Australia ces muaj cov feem pua loj tshaj plaws txog li -444.8 uas khwv tsis tau nyiaj sib npaug ntawm poj niam thiab txiv neej thiab tau txais txiaj ntsim ntau dua rau tej poj niam.

Lub koom haum WGEA, uas yog tsoom fwv teb chaws ib lub koom haum tau txheeb tau tias tus kab theem feem pua nrab ntawm haiv neeg Australia tej poj niam thiab txiv neej khwv tsis tau nyiaj sib npaug yog 19 feem pua, uas xam raws li tej paj tshaj uas ib tug neeg ua hauj lwm twg tau — suav cov base salary, superannuation, overtime, thiab bonuses.

Txhais tau tias tej nyiaj nrab uas poj niam khwv tau ib lub xyoos twg yeej khwv tau tsawg dua $18,461 ntawm tej nyiaj nrab uas tej txiv neej khwv tau. Thiab yog xam raws tej nyiaj li uas khwv tau nkaus xwb, ces ib tug poj niam yeej tseem khwv tau tsawg dua $11,542 ntawm tej uas ib tug txiv neej uas ua hauj lwm ua ke khwv tau thiab.

Tej lagluam uas muaj cov teeb meem poj niam thiab txiv neej khwv tsis tau nyiaj siab npaug ntau tshaj plaws

Tsab ntawd cej luam no tau txheeb tau tias tej nyiaj nrab uas tej poj niam khwv tau tseem khwv tau tsawg dua tej nyiaj nrab uas tej txiv neej khwv tau ntawm txhua yam lagluam thoob plaws teb chaws no thiab.

Tab sis cov lagluam construction industry yog cov lagluam uas tej poj niam khwv tau nyiaj nrab tsawg tshaj plaws yuav laug txog 32 feem pua piv rau tej nyiaj nrab uas tej txiv neej khwv tau.

Hos tej lagluam uas muaj kev sib tu ncua rau tej kev khwv tau nyiaj sib npaug ntawm poj niam thiab txiv neej tsawg tshaj plaws txog li 1.9 feem pua ces yog cov lagluam chaw so thiab zaub mov.

Thiab haj yam muaj teeb meem loj tuaj ntxiv rau cov kev khwv tsis tau nyiaj siab npaug ntawm poj niam thiab txiv neej rau tej lagluam uas yuav tau tos tej bonuses thiab cov kev ua hauj lwm overtime — li tej lagluam transport, xa khoom xa ntawv, tej lagluam warehousing, hluav taws xob, gas, dej thiab khoom seem txheej, uas yeej tseem pom tias tseem muaj cov kev them nyiaj ntau tshaj ob npaug cov gender pay gap lawm thiab.

Muaj tej tuam txhab lagluam tshaj 3000 lub yeej tseem muaj cov teeb meem gender pay gap uas tau txais txiaj ntsim rau tej txiv neej ntau dua - txhais tau tias lawv tseem them nyiaj rau txiv neej ntau dua poj niam.

Tej lagluam uas muaj poj niam ua coob yeej muaj teeb meem khwv tsis tau nyiaj sib npaug ntawm poj niam thiab txiv neej tsawg dua.

Lub koom haum WGEA tsab ntawv cej luam tau qhia tias muaj feem cuam tshuam ntawm poj niam txoj kev ua tus coj thiab cov kev muaj teeb meem tsawg rau cov kev khwv tsis tau nyiaj sib npaug ntawm poj niam thiab txiv neej.

Tus kab theem feem pua nrab ntawm tej tswv lagluam uas muaj tej teeb meem khwv tsis tau nyiaj sib npaug ntawm poj niam thiab txiv neej uas muaj tej coj poj niam yam tsawg li ib tug ces tsuas muaj txog li 5.4% xwb yog piv rau rau tej tswv lagluam uas tsis muaj poj niam ua tus coj ces tseem muaj cov kev sib tu ncua no txog li 10.9 feem pua diam.

Thiab lub koom haum no kuj txheeb tau tias yuav muaj cov teeb meem khwv tsis tau nyiaj siab npaug ntawm poj niam thiab txiv neej tsawg dua thaum muaj tej poj niam coob los ua cov coj ntau dua thiab.

Raws li tsab ntawv cej luam no tau qhia ces tej tswv lagluam uas muaj poj niam thiab txiv neej ua cov coj sib npaug ces tej zaum kuj yuav muaj tej teeb meem khwv tau nyiaj tsis sib npaug ntawm poj niam thiab txiv neej tsawg dua li ntawm ob npaug tib yam li tej tswv lagluam uas muaj tej poj niam ua cov coj txij 0 mus txog 20 feem pua.

Tsoom fwv hais tias muaj tej teeb meem poj niam khwv tau nyiaj tsis sib npaug li txiv neej 'tsawg tshaj plaws'

Ua ntej yuav coj tsab ntawv cej luam no los nthuav tawm, ces Tony Burke uas yog tus nom tswj dej num ntiav dag zog yeej tau teev txog lub koom haum Australian Bureau of Statistics (ABS) limtiam dhau los tias, tam sim no muaj cov teeb meem poj niam khwv tsis tau nyiaj sib npaug li txiv neej ''tsawg tshaj plaws raws li tau teev tseg'' uas tsuas muaj txog li 12 feem pua xwb. Thiab nws kuj tau hais tias tus zauv feem pua nrab ntawm tus tsoom fwv koom tswj dhau los ces tseem yog 15.4 feem pua.

Nws tau qhia rau tsev tsoom fwv teb chaws rau hnub zwj Hli (Monday) dhau los tias "Tsis yog nyob nyob cia li lam tshwm muaj tej xwm txheej no los yog cia li muaj ob yam los yog ntau yam xwm txheej tshwm sim rau tib lub caij xwb. Tab sis yog tus tsoom fwv no cov kev no tej hauj lwm uas tsis yog xav kom tej neeg khwv tau nyiaj ntau ntxiv tuaj xwb, tab sis xav kom muaj tej xwm txheej no tshwm sim coj los ua ib txoj xub ke los daws cov teeb meem uas poj niam pheej tseem khwv tau nyiaj tsis sib npaug li txiv neej.''

Mloog tau ntau yam xov xwm ntxiv txog poj niam tseem khwv tsis tau nyiaj sib npaug li txiv neej tau ntawm no:

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.